REDACCIÓN. LES NOTICIES. UVIÉU – 11/10/2012 A LES 14:30:06
Esti miércoles 10 d’ochobre, Inaciu Galán, presidente d’Iniciativa pol Asturianu foi recibíu nel llar de la Secció Filològica del l’Institut d’Estudis Catalans (IEC), l’academia de la llingua catalana, en Barcelona. Nel conceyu, Galán presentó l’informe Definir el términu «asturianu» con xeitu. Informe sobre la presencia del vocablu «asturianu» y otros términos nos diccionarios normativos d’otres llingües, que solicitá al IEC un cambiu na definición de los términos asturià, lleonès y bable nel so diccionariu, onde la nuestra llingua nun aparecen definíos a les clares como idioma. Según la organización, la respuesta de los miembros de la institución foi «bien positiva» y, anque esta enmienda ha pasar entá pel procesu correspondiente, la disposición del Institut pa esti cambiu foi «absoluta».
El trabayu presentáu propón a la institución que la definición de la nuestra llingua dexe de referise a «conxuntu de fales» pa responder a la realidá ciéntifica y llegal, que dexa a les clares que l’asturianu ye un idioma. Avalaron esti informe un llistáu de profesores qu’inclúi a más de diez universidaes de países como Xapón o Portugal, a la decana de la Facultá de Filosofía y Lletres de la Universidá d’Uviéu y a catedráticos y profesores. Pa Iniciativa pol Asturianu ye innegable la necesidá de cambiar esta definición del Diccionario del IEC, «pues ye una cuestión de respetu a la realidá sociollingüística d’Asturies y del restu de los territorios asturfalantes».