Nota de prensa del I Certame de monólogu modernu.
————————————————————-
El próximu día 3 de marzu va celebrase na Sala Albéniz de Xixón, el I Certame de Monólogu Modernu n’Asturianu organizáu por H.A XAREOS. El certame ñaz col nidiu enfotu de modernizar un área na que l’asturianu siempre tuvo normalizao dafechu: Los monólogos. El problema qu’esiste nesti sen, ye qu’esos monólogos nun yeren actuales, sinón que taben arrequexaos nuna temática rural y na estética de ‘boina y cayáu’ que nun resulta mui atrayente pa la mocedá d’anguaño. Poro, la nuesa intención foi dende un entamu, y viendo’l puxu qu’estos monólogos taben teniendo en castellán, el consiguir qu’esta parte de les artes escéniques enraigonada cuantayá na nuesa cultura, siga nel sieglu ventiún siendo un referente na vida cultural de los asturianos y lo siga siendo n’asturianu, con unes formes y una temática renovaes.
El I Certame de Monólogu Modernu n’Asturianu organizáu por H.A XAREOS, va tener como maestru de ceremonies al collaborador de Televisión Llocal Xixón (TLG), Inaciu Galán y González, y dientro del so programa, l’actuación de los monologuistes Toño Caamaño, Carlos Cellero, Lluis Antón González (Con testu de Chechu García), y Benxa Pérez. Amái, podrá oyíse la meyor música asturiana nuna prefolixa que va celebrase nel llocal una hora enantes del entamu del espectáculu, a les 21.00h. L’actuación del grupu folc Tarañu pesllará’l Certame y pa finar dafechu, habrá una llectura d’un manifiestu pola defensa del asturianu y la cultura asturianes. Dalgo mui importante pa movilizar a la xente de cara a la manifestación pola oficialidá del día 5.
La nuesa organización vio conveniente que d’esti actu participare de dalguna manera la Xunta Pola Defensa de la Llingua Asturiana y demientres duré tol Certame van podese mercar productos d’esta organización nun puestín colocáu a tal efeutu na sala.
La canal de televisión TLG, el selmanal LES NOTICIES y el diariu lletrónicu ASTURIES.COM collaborarán a lo llargo de les selmanes anteriores, dando a conocer el conteníu del Certame. Parte del actu ta patrocináu pola empresa asturiana de publicidá y gráfiques PUBLIGRAFIK, el Sortéu de llibros por Trabe Ediciones y les entraes puen atopase en: Mavy’s Pub (Xixón), Chigre El Naranco (Uviéu), Llibrería Alborá (Xixón), Café Trisquel (Xixón), El Barucu (Xixón), Llibrería Paradiso (Xixón), Llibrería Seronda (Avilés), Astur-King (Xixón) y na sede de la XPDLA n’Uviéu y llamando al teléfonu 615982816.
Aguardamos que vos preste’l plantegamientu del actu y qu’asistáis colos vuesos amigos y familiares. Les entraes tienen un preciu de 6 € nos llugares de venta y van poder mercase a 8 € na taquiella nun númberu mui reducíu.
MÁS INFORMACIÓN: WWW.XAREOS.COM