Pallabres nel pieslle y entrega de diplomes de los IV CURSOS D’ASTURIANU EN XIXÓN

INICIATIVA POL ASTURIANU · CUPA · ACADEMIA DE LA LLINGUA ASTURIANA

26 de xunu de 2014

Inaciu Galán y González

Estimaos representantes de l’Academia de la Llingua Asturiana y el Conceyu Universitariu pol Asturianu, estimaos alumnos, collacios y collacies toos:

En primer llugar quiero davos la bienllegada a esti actu de pieslle y entrega de diplomes de los IV Cursos d’Asturianu en Xixón, que facemos porque seya un momentu pa reconocer al alumnáu l’esfuerciu, agora recompensáu colos diplomes que güei vos entregamos.

En marzu 2011, el Conceyu Universitariu pol Asturianu, el CUPA, entamaba en collaboración cola Academia de la Llingua Asturiana estos cursos d’asturianu en Xixón, los que dempués se sumaría Iniciativa pol Asturianu con tola implicación. Esti añu lleguen a la so cuarta edición con más de 150 alumnos que pasaron yá peles aules pa formase nel usu del nuesu idioma y nun podemos tar más satisfechos del resultáu.

Como director de los cursos nun puedo tar más satisfechu de los dos niveles qu’esti añu tuvimos. Alumnos y alumnes con ganes, implicaos, defensores de la so llingua, trabayadores. Asina presta pola vida poner clas d’asturianu.

Dende Iniciativa pol Asturianu queremos animavos a qu’estos cursos seyan un pasu más na vuesa rellación cola llingua asturiana. Necesitamos cuntar con vosotros, porque la llingua que deprendéis nestos cursos, fuera de les aules d’esti Conseyu, vive, como sabéis, una situación que nun ye la que más mos prestaría. Y como ciudadanos y ciudadanes d’Asturies, ye responsabilidá de nueso trabayar pa que’l patrimoniu que mos entregaron los nuesos mayores, llegue a les próximes xeneraciones conserváu y si ye posibile, en meyores condiciones tovía.

Estos díes vivimos momentos llaceriosos d’ataque al asturianu nel ámbitu más importante pa un idioma minorizáu como’l nuesu, el sistema educativu. Dellos sectores reacciones tán faciendo por manipular a la sociedá asturiana y ponela en contra de lo suyo, en contra de sí mesmos. Pero los asturianos nun somos fatos y tamos respondiendo con contundencia. Porque deprender asturianu na escuela ye un drechu, tenemos a la llei de la nuesa parte, y tenemos la voluntá de les families asturianes, que manden a los sos fíos a clases d’asturianu dende va yá trenta años.

Mientres falamos equí, n’Uviéu, preséntase’l que sedrá’l primer sistema operativu pa móvil que podrá usase n’asturianu. Un exemplu de tantos, de que’l trabayu pol asturianu tien resultaos y de que la nuesa llingua tien futuru.

Tocarános siguir trabayando pa evitar los pasos atrás, pa consiguir más avanves pal idioma. Y vosotros, col usu diariu, en tolos ámbitos, con toles persones, podéis facer muncho. Porque una llingua que ta viva nel día a día d’una sociedá, nun desapaez por muncho que dalgunos poderes faigan tolos posibles por valtala. Cuntamos con vós pa que seyáis guía pa munchos asturianu, exemplu de compromisu y llealtá con esti idioma nuesu tan maltratáu.

Nun quiero rematar estes pallabres ensin tener el más fondu agradecimientu pa col personal del Conseyu de la Mocedá de Xixón pol so sofitu, siempres disponible pa que les cuestiones d’intendencia de los cursos nun supunxeran problema nengún pal desendolcu de los mesmos.

Con toles ganes, pol sofitu de la sociedá a esta iniciativa, trabayamos yá na preparación de los que sedrán, los V Cursos d’Asturianu en Xixón, pa dempués del branu, nos qu’esperamos poder presentar novedaes, nuevos cursos con conteníos estremaos, que completen la ufierta de siempres. Aguardando cuntar con vosotros y que tamién otres persones se sumen a esta esperiencia, quiero davos la norabona pol llabor.

Munches gracies y ¡Puxa Asturies!

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.