Esti próximu xueves, día 12 de xineru, el Club de La Nueva España en Xixón tien programada la presentación del nonu númberu de la revista «Formientu», na que van intervenir, ente otros, el director de la publicación, Inaciu Galán, xunto con Laura Marcos y Benxa Pérez, del conseyu de redacción de «Formientu». L’actu va servir pa despidir a los autores de más edá, que pasen yá la edá máxima pa espublizar na revista, puesta agora nel añu 1980, como fecha mínima de nacencia.
Xareos! Xestión Cultural espubliza un númberu nuevu de la revista de lliteratura “mui” moza, Formientu, que cumplió 5 años apocayá, con dos númberos añales saliendo al mercáu lliterariu dende 2006. Los responsables de la revista espliquen como “dempués de cinco años llegaba’l momentu de dicir adiós a dalgunos de los sos collaboradores, qu’entamaron siendo bien mozos y que tienen yá encadarmada una carrera lliteraria, con premios y volúmenes propios nel mercáu en munchos casos”, polo que nesti númberu va poder oyese per última vegada nesta publicación la voz d’autores como Pablo Rodríguez Medina, Ricardo Candás o José Ángel Gayol.
Dende’l númberu viniente, el 10, namás van poder espublizar testos los autores ñacíos dende 1980 n’adelantre, tarazando cinco años la edá máxima permitida pa la publicación nesta revista sotitulada de lliteratura “mui moza”.
El númberu 9 apurre amás otra novedá al llector. Estrénase la estaya de crítica, sobre la que na revista esplique “costó, pero por fin, dalgún autor mozu animóse a abrir camín nesta abegosa xera de la crítica y equí ta’l resultáu qu’esperemos que tenga continuidá en númberos próximos”.
A lo llargo d’esti añu Xareos! Xestión Cultural va organizar dellos actos pa celebrar los primeros cinco años d’esistencia de Formientu, que la convierten na revista lliteraria fecha dende la iniciativa privada con más años al llombu d’ente les que s’asoleyen n’asturianu con regularidá.
Nesti númberu apaecen poemes de Pablo Rodríguez Medina, Xurde Fernández, Ricardo Candás y Héctor Pérez Iglesias. Testos narrativos d’Abel Martínez, Jorge Fernández García, Pablo A. Quiroga Prendes, Rubén Rey Menéndez ya Inacio Rodríguez-Solar. Amás de dos crítiques de llibros, feches por Iván Cuevas y José Ángel Gayol sobre «Les últimes pallabres» y «Pequeñu álbum de familia».