¿Qué hai de nuevu, vieyu?

Quien siga con della atención la lliteratura asturiana más moza, coincidirá comigo en que’l rasgu que la caracteriza ye la pluralidá. Poco tien que ver la obra total d’Héctor Pérez Iglesias, por exemplu, cola verdá lliteraria de Vanessa Gutiérrez; o les propuestes intuitives de Pablo Texón col oficiu narrativu compactu de Quique Faes o cola variedá intelixente de José Luis Rendueles, por citar namás cinco autores altamente recomendables d’ente la docena y media que más nos interesa. Si entráramos más en detalle, si diéramos más nomes, podría vese hasta qué puntu la propuesta lliteraria de la xente tovía más moza se facía diversa, como si a costafecha esi grupu d’autores quixera que’l so rasgu distintivu fuera escapar d’una «tendencia hexemónica» como tamién se dio en llamar, pa la lliteratura asturiana, la obra lliteraria más destacable (particularmente poética) de los años ochenta y noventa.

Esa idea de pluralidá cásique como bandera pue comprobala quien s’asome a la nueva entrega de la revista Formientu, que cumple seis años y acaba de sacar el númberu 11, siempre baxo la dirección entregada del inquietu y plural Inaciu Galán, convertíu yá nuna pieza esencial del asturianismu más activu. Periodista, poeta y traductor, lleva tantos años na primer llinia d’actuación que cuesta trabayu pensar que Galán, presidente d’Iniciativa pol Asturianu, naciera en 1986. Y yá que falamos d’años, son quince los que separen a la escritora de más edá de los que publiquen na revista, la profesora Noemí Rodríguez, nacida en 1979, de la más nueva, Blanca Fernández Quintana, estudiante de Bachilleratu que nació en 1994. Ente una y otra hai variedá de poetes y narradores y tamién una obra de teatru, destacando, como yá pasó n’otros númberos d’esta publicación, que munchos autores fain la so estrena como tales nestes páxines.

Pero «Formientu» tien una característica novedosa que se repite con frecuencia númberu tres númberu, y que pue dar una idea de per ónde se mueve agora l’asturianismu más mozu: pue falase d’un «pan-asturlleonesismu» cultural, qu’acarreta pa estes páxines como seña d’identidá xeneracional la obra d’autores de más p’allá de les fronteres alministratives asturianes. Si n’otros númberos pudímos lleer textos d’escritores zamoranos, «belxicanos», arxentinos o cántabros, nesta ocasión alcontramos lleoneses (Abel Aparicio González) o estremeños (Ismael Carmona), amás d’un autor nacíu en Madrid (Belarmino Daniel Álvarez), seique fíu de la emigración. Dacuando, na parte negativa de la pesa, echamos en falta más oficiu nos autores que s’estrenen: de munchos d’ellos nun volvemos a saber nada, como si lo que publiquen fuera un desafuegu momentaniu más que’l frutu d’un llabor persistente. Ello, claro, amenorga n’ocasiones el valir d’una publicación más atenta a veces al datu xeográficu o biográficu (la procedencia o la edá como criterios pa publicar) qu’al rigor lliterariu, que ye lo que s’espera d’una revista de lliteratura.