Esta selmana dexé de ser presidente del Conceyu Universitariu pol Asturianu, el CUPA, un proyectu que fundé nel añu 2006 al ver la llaceriosa situación cola que m’atopé pal asturianu na Universidá d’Uviéu y la indefensión que sentía en munchos casos cuando sufría discriminación llingüística per parte de la institución na qu’estudiaba entós. Ensiguida acompañóme nel camín Javier Cubero, col que trabayé muncho nesti campu nos seis años últimos.
Otres persones collaboraron con nós a lo llargo d’estos años nos que’l CUPA dionos allegríes y malos momentos. A la fin, tengo pa min que’l balance ye bonu. Güei l’asturianu ye una llingua un poco más normal de lo que lo yera na unviersidá asturiana va seis años y el CUPA tuvo muncho que ver nesi cambiu, con un llabor discretu, a vegaes poco entendíu, pero efectivu y con resultaos visibles.
Güei pueden facese tesis n’asturianu ensin problemes, la web y los estatutos tán n’asturianu, pueden presentase obres lliteraries nos premios de la universidá, el rector usa l’asturianu de xemes en cuando nes sos intervenciones y los estudios universitarios d’asturianu, pa profesoráu y filólogos, son oficiales y dafechu homologaos col restu. Y sobre manera, nun hai una situación d’hostilidá hacia l’asturianu per parte de les instituciones universitaries.
Entá queda muncho por facer, pero nun pue dicise que fueran unos años en baldre. Ye más, pue dicise que son los años nos que, con diferencia, más s’avanzó a favor del asturianu de los 400 que lleva la Universidá d’Uviéu en funcionamientu.
Sicasí, entá queda muncho trabayu por facer, un alcuerdu programáticu con ambicioses midíes al que se comprometió col CUPA’l Rector Vicente Gotor (y que cunta col consensu de la oposición), y qu’ha facese cumplir. Nesti camín van siguir trabayando Borja González Cantora, nuevu presidente y Eduardo Abad García, vicepresidente, a los que-yos deseo muncha suerte y a los que, tanto yo como Javier Cubero siguiremos apoyando con aquello poco que pudiéremos deprender nestos años al frente del CUPA.
Equí pue lleese un resume del llabor del CUPA nestos seis años últimos.