Les Noticies.com. Diariu dixital. 12-11-2012
Isaac del Rivero (Colunga, 1931) ye dibuxante de cómics y ún de los activistes culturales más importantes de les décades de los 70 y 80. D’él surdió’l Certame Internacional de CIne Infantil y Xuvenil de Xixón -precursos de FICXixón- o revistes tan mítiques comoEl Gomeru. Autor d’obres como l’adaptación en viñetes de la vida de Xovellanos, agora acaba de publicar con Ediciones Trabe un cómic nuevu n’asturianu, Doña Berta, ganador del Premiu Alfonso Iglesias nel 2011. Trátase d’una versión llibre de la novela de Leopoldo Alas, Clarín, que narra la historia de Doña Berta, una muyer que ye l’últimu esllabón de la estirpe de los Rondaliegos y que conoz un día a un pintor mozu que-y trai alcordances y culpes del pasáu.
Yá fixo delles versiones al cómic d’obres de Clarín, ¿por qué quixo agora ponese con Doña Berta?
Siempre que toi lleendo una novela, na mio cabeza toi adaptándola cinematográficamente. Doña Berta ye una narración curtia y, anque la historia acaba en Madrid, ta ambientada n’Asturies. Asina que me pareció mui afayadiza pa llevala al cómic.
¿Cuánto tiempu llevó esi procesu de convertila nun cómic?
Llevóme too un añu de trabayu.
¿Cómo ye’l procesu pa facer una viñeta?
Ye dalgo cenciello. Primero faigo a llápiz lo que va ser la páxina, amás de dexar espaciu pal testu, dalgo que parez fácil pero que tien el so aquel: si nun se fai bien y nun se correspuende col tamañu del testu pues acabar estropiando toa una viñeta. Depués pases la fueya a pluma y, entós, vien el momentu de colorear a acuarela con un pincel. Tamién hai un trabayu de documentación importante. Por exemplu, pa dibuxar el tren nel que Doña Berta va a Madrid, tuvi que dir al Muséu del Ferrocarril y sacar delles semeyes, porque nun vas dibuxar un tren de güei nuna historia que pasa nel sieglu XIX.
¿Qué proyectos tien dientro del mundu del cómic?
Quiero volver a publicar la revista El Gomeru, parez qu’en La Nueva España hai más posibilidaes que n’El Comercio. Tengo preparaes cuatro maquetes y a ver si se pue publicar nes páxines centrales del periódicu de forma selmanal. Quería tirar por ello: Una revista onde publiquen los profesionales del cómic asturianu, pero sobre too pa sacar a la xente mozo que ta faciendo cómic equí, n’Asturies. Ehí ta l’exemplu d’Alfonso Zapico…
Empezó nesa revista y güei ye un Premiu Nacional de Cómic…
Alcuérdome que vieno un día per equí con unes fueyes, pa ver que me parecíen los dibuxos… Dixe que sí y mira hasta onde llegó. Con too, tuvo que marchar fuera porque equí ye dalgo imposible: Hai un desapegu polo nuestro increible.
¿Qué supunxo pal mundu del cómic asturianu esa revista?
Dende’l Gobiernu teníen que tener en cuenta lo que pasó con El Gomeru, onde surdieron nomes nuevos que daquella nun teníen onde publicar. Agora nun hai nada, namás esti Premiu Alfonso Iglesias. Dende la Conseyería de Cultura tienen que dase cuenta que’l cómic nun ye nenguna babayada. Yo toi agora colo d’El Gomeru y ensin sacar nengún beneficiu. Lo interesante ye que salga y poder descubrir grandes nomes d’equí, non el beneficiu económicu. Enantes de traer a una gran figurona de fuera, lo primero ye dar campu a la xente d’equí.
¿D’ónde-y vien l’interés pol cómic n’asturianu?
Vien mui d’atrás. Na Dictadura, si en clase dicíes un ye venía’l profesor y dábate con una regla nes uñes. Eso queda dientro y parez que depués cuesta ponete a falar n’asturianu, pero hai qu’entrar por ello. A mi l’asturianu préstame muncho, porque ye una llingua bien guapa. El nuestru idioma yá ta nes escueles y parez que tamos arrincando, polo que me parez una idea mui bona puxar por ello al traviés de los cómics. Sicasí, yo tengo que tener l’ayudina de daquién que domine la llingua meyor que yo, como Chechu García o Inaciu Galán.
¿Qué supón ganar el Premiu Alfonso Iglesias?
Pues mire, a Alfonso Iglesias conocílu personalmente y tuvi muncha amistá con él. Con 17 añinos yo facía tires cómiques y atrevime a facer una presentación y dir a La Nueva España, cola casualidá de qu’ellí taba Alfonso Iglesias. Al veme la carpetina colos dibuxos quixo echar un güeyu y dixo que taben mui guapos. Ehí foi cuando empecé a publicar nel periódicu. Años depués, a finales de los setenta estrenamos Las aventuras de Pinín y sus amigos nel Certame Internacional de Cine Infantil y Xuvenil de Xixón.
Agora ye asesor de la 50 edición de FICXixón…
El Festival de Cine empecélo yo nel 63 como Certame de Cine Infantil, porque daquella cuasi nun había posibilidá de que los rapazos pudieran ver películes que tuvieren feches pa ellos. Depués vieno un conceyal y quitó lo de los guah.es ensin contar conmigo, que yera’l fundador del festival. Dixo que los neños yá medraran… Dende esi momentu, el Certame pasó a ser Festival y la mio llucha ye que vuelva a ser lo que foi nun pricipiu. Agora ye lo mesmo qu’hai n’otros llaos, nun ye dalgo especializao. Depués crearon una sección que se llama Enfants Terribles, nun sabía yo que tuviéremos en Francia… Amás, agora tán celebrando la 50 edición de FICXixón, cuando’l Festival apareció nos ochenta, enantes había un Certame de Cine Infantil…
Fonte: Les Noticies