Acaba d’anunciase en prensa lo que sabía dende va unes selmanes. El Centru Asturianu de Madrid otórgame’l Premiu Urogallo de Bronce 2012 na estaya de Llingua Asturiana. Conocía bien el premiu, pero al revisar el llistáu de ganadores d’otros años toi un poco asustáu y mui agradecíu. Tolos ganadores anteriores teníen al llombu munchos más años que yo de trabayu pol idioma al llombu y una media d’unos 60 años. Por ello, siento una gran responsabilidá y agradecimientu al recibilu tan mozu.

Ye un honor forma parte d’esti llistáu de persones, onde hai delles que por desgracia yá nun tán con nós y poles que tengo gran almiración. Gracies a toos, sois munchos, los que sofitáis el llabor que faigo cada día lo meyor que puedo pol nuesu idioma. El premiu da fuercies pa siguir con puxu.

La entrega del premiu tendrá llugar nun actu n’agostu, na Feria de Muestres d’Asturies en Xixón.

Llistáu de ganadores del Premiu.

Continue reading «Premiu Urogallo de Bronce 2012»

Preparo’l mio Trabayu de Fin de Máster na Universitat Oberta de Catalunya, tituláu “Llingües minorizaes y nueves tecnoloxíes: una güeyada al casu del asturianu”. La fin d’esti estudiu ye conocer la situación actual del usu del asturianu n’internet y cómo esti usu inflúi na so situación sociollingüística.
Pa ello pídote que tu, usuariu de la llingua asturiana na rede, dediques unos minutos a contestar a delles entrugues sobre esti tema. Los datos personales van ser usaos nel trabayu de forma anónima.

La fecha última pa contestar esta encuesta ye’l día 2 de xineru de 2013.

Tardarás namás unos minutos, son namás 18 entrugues y puedes facela nesti enllaz:https://es.surveymonkey.com/s/S8LTFJ7

Munches gracies por echar un gabitu nesta investigación, bones fiestes y bon añu 2013.

Esti martes tuvo llugar el I Congresu del Conceyu Universitariu pol Asturianu (CUPA) tres seis años d’actividá reivindicativa na universidá asturiana. L’estudiante Borja González Cantora sustitúi na presidencia del coleutivu a Inaciu Galán. Esti cambiu nel CUPA nun significa la salida de Galán –qu’anguaño taba compatilizando’l cargu col de presidente d’Iniciativa pol Asturianu– de la direutiva, yá que va encargase de la vocalía de Rellaciones Institucionales. Mentes, Javier Cubero, hasta’l momentu vicepresidente, pasa a llevar les riendes de l’ayalguería de la organización, puestu qu’ocupaba Isaac de la Arada. Eduardo Abad García ye’l vicepresidente nuevu. Galán y Cubero esperen que la so salida de los cargos sirva “pa permitir una anovación de la organización”, pero permanecen na direutiva col ánimu de “tresmitir la so esperiencia y collaborar col trespasu de responsabilidaes a nueves xeneraciones”. Nel Congresu del CUPA tomáronse delles decisiones estratéxiques de cara a los años próximos, como l’enfotu en siguir medrando como organización, l’apertura a la collaboración con otros coleutivos del ámbitu de la reivindicación llingüística y el caltenimientu del trabayu pal cumplientu del Alcuerdu Programáticu pa la Política Llingüística na Universidá d’Uviéu (2012-2016), firmáu pol actual Rector, Vicente Gotor y pola so oponente Paz Andrés, na campaña, y que va permitir, en llevándose alantre, “importantes avances pa la llingua asturiana na Universidá d’Uviéu, como la creación d’un llogotipu billingüe o d’un reglamentu de rotulación billingüe d’instalaciones”.

Fonte: Asturies.com

Esta selmana dexé de ser presidente del Conceyu Universitariu pol Asturianu, el CUPA, un proyectu que fundé nel añu 2006 al ver la llaceriosa situación cola que m’atopé pal asturianu na Universidá d’Uviéu y la indefensión que sentía en munchos casos cuando sufría discriminación llingüística per parte de la institución na qu’estudiaba entós. Ensiguida acompañóme nel camín Javier Cubero, col que trabayé muncho nesti campu nos seis años últimos.

Otres persones collaboraron con nós a lo llargo d’estos años nos que’l CUPA dionos allegríes y malos momentos. A la fin, tengo pa min que’l balance ye bonu. Güei l’asturianu ye una llingua un poco más normal de lo que lo yera na unviersidá asturiana va seis años y el CUPA tuvo muncho que ver nesi cambiu, con un llabor discretu, a vegaes poco entendíu, pero efectivu y con resultaos visibles.

Güei pueden facese tesis n’asturianu ensin problemes, la web y los estatutos tán n’asturianu, pueden presentase obres lliteraries nos premios de la universidá, el rector usa l’asturianu de xemes en cuando nes sos intervenciones y los estudios universitarios d’asturianu, pa profesoráu y filólogos, son oficiales y dafechu homologaos col restu. Y sobre manera, nun hai una situación d’hostilidá hacia l’asturianu per parte de les instituciones universitaries.

Entá queda muncho por facer, pero nun pue dicise que fueran unos años en baldre. Ye más, pue dicise que son los años nos que, con diferencia, más s’avanzó a favor del asturianu de los 400 que lleva la Universidá d’Uviéu en funcionamientu.

Sicasí, entá queda muncho trabayu por facer, un alcuerdu programáticu con ambicioses midíes al que se comprometió col CUPA’l Rector Vicente Gotor (y que cunta col consensu de la oposición), y qu’ha facese cumplir. Nesti camín van siguir trabayando Borja González Cantora, nuevu presidente y Eduardo Abad García, vicepresidente, a los que-yos deseo muncha suerte y a los que, tanto yo como Javier Cubero siguiremos apoyando con aquello poco que pudiéremos deprender nestos años al frente del CUPA.

Equí pue lleese un resume del llabor del CUPA nestos seis años últimos.

Más info de la nueva directiva equí.