Va unos meses espublizaba un artículu, La esmolecedora situación del movimientu de reivindicación llingüística, nel que facía una analís de la situación que vive la vindicación del nuesu idioma n’Asturies. Dende entós fueron munches les persones que me contestaron, de forma pública o privada, pa compartir conmigo les sos esmoliciones sobre esti asuntu. Foi unu d’ellos, Vítor Suárez, que me contestare con otru artículu asemeyáu, quien me convenció pa ponenos en marcha, pa tomar la iniciativa.
Dempués de dellos meses trabayando d’un xeitu discretu y modestu, pero con ganes, esta selmana sal a la lluz una organización nueva, Iniciativa pol Asturianu, que vien a complementar el texíu asociativu de la reivindicación llingüística n’Asturies.
Adulces, decenes de persones yá tomaron la iniciativa y tán poniendo un granín d’arena d’estremaes formes pa qu’esti proyectu seya una realidá con futuru, más que pol fechu de crear una organización, que nun ye más qu’una ferramienta, pa cuntar con una plataforma dende la que llevar alantre campañes y acciones que supongan avances tanxibles pal asturianu.
Estes selmanes atrás aconceyóse coles organizaciones que yá vienen trabayando nesti campu, d’una o d’otra manera , pa presentanos y abrir víes de comunicación y collaboración. Iniciativa pol Asturianu vien a construyir y a arriquecer el trabayu pol asturianu, nunca a poner torgues o crear problemes, y el recibimientu foi mui positivu per parte de toles organizaciones coles que falamos.
Les persones que formamos parte d’Iniciativa pol Asturianu, munchos d’ellos xente mozo, vienen con ganes y con una idea bien clara, el futuru del asturianu depende de nós, de tolos asturianos y asturianes. La clas política, los poderes en xeneral, tienen una responsabilidá perimportante por nun reconocer los nuesos drechos al traviés de la oficialidá y d’unes polítiques de normalización actives, pero ye la ciudadanía la única que puede garantizar la tresmisión del idioma y la so sobrevivencia real, col usu en toles estayes de la sociedá. Implicar a la xente, facer que tomen la iniciativa pol asturianu, sedrá’l nuesu llabor prioritariu.
Esti sábadu que vien, 17 d’avientu, daremos anuncia pública d’esti proyectu que yá ta en marcha con un actu nel que cuntaremos con munches persones de toles estayes de la sociedá, con delles actuaciones y dalgunes sorpreses. Un momentu pa entamar nesti llabor de devolver la ilusión nel trabayu, llargu y duru, de caltener, recuperar y dignificar la nuesa llingua. Anímovos a sumavos y tomar la Iniciativa pol Asturianu.
Iniciativa pol Asturianu puede siguise yá en facebook.com/iniciativapolasturianu y en Twitter en @iniciativaxAST
