Discursu d’Inaciu Galán nel Premiu de Periodismu “Moscones en Xixón”

DISCURSU ENTREGA
PREMIU DE PERIODISMU “MOSCONES EN XIXÓN”

1 de mayu de 2011 – Capiella los Dolores – Grau
Inaciu Galán y González

Sr. Alcade, Conceyales, demás autoridaes, miembros de Moscones en Xixón, amigos y amigues:

Nun día nel que’l Conceyu de Grau y l’asociación de Moscones en Xixón m’ufren tantos honores y afalagos nun puedo tar más que satisfechu y agradecíu pa con esti conceyu, pa con tolos moscones. Y al escribir esti discursu, púnxime a pensar, ¿qué puedo cunta-yos yo a los collacios de Grau pa nun los aburrir demasiao? Y pensando, dándo-y vueltes a la cabeza… ¿cuál yera’l primer recuerdu que tenía de Grau?

El primer recuerdu que tengo de Grau ye de cuando yera mui mui neñu. Mio güelu participara na construcción d’un edificiu, equí na villa de Grau, y vinimos a visitalu. Esperándolu diome por xugar col mecheru esti que traen los coches y… fatu que yá yera entós, quemé un deu, col consiguiente drama familiar, tantu drama qu’entá recuerdo aquel día, y yera mui pequeñu. La mio rellación con esti conceyu nun entamó mui bien, digamos que taba un pocu quemáu con Grau. La bona noticia ye que dende entós la cosa nun fizo más qu’ameyorar.

dibujo.jpg

Na parcela onde mio güelu fizo aquel edificiu, equí en Grau, había un horru, y esi horru acabó, gracies al apreciu de mio güelu pola cultura asturiana, na so finca de La Collá, en Siero. Asina que dende bien pequeñu, sentía que na finca de mios güelos había un cachín del conceyu de Grau, los mios xuguetes, los trastos de cuando diba de campamentu, taben guardaos naquel espaciu que yera parte del territoriu de Grau inxertu en Siero. Pue dicise que pasé munchos branos xugando en Grau, xubiendo a por ablanes y nueces a Grau… al horru de mios güelos.

Apocayá tuvi la oportunidá de conocer, faciendo un trabayu pa una editorial sobre escueles rurales, dellos pueblinos del conceyu de Grau y sobre too a la so xente. Santa María Grau, El Friesnu col so guapu santuariu, testigu de batalles de la Guerra de la Independencia, Llauréu, Siaza, Santa María Grau, Sorribas, Vigaña… y otros más, onde pudi conocer a munchos moscones.

Nun tien qu’estrañavos polo tanto lo que del vuesu conceyu cuntaba nesi artículu que’l xuráu tuvo a bien premiar. El Conceyu de Grau ye un conceyu con un movimientu cultural tremendu. Nun hai selmana na que nel diariu cultural onde trabayo como redactor, Asturnews, nun se faigan delles referencies a actividaes culturales en Grau.

discursu2.jpg

Güei toi equí, con vosotros, ¿qué dicir más? Que nun puedo tar más agradecíu por esti premiu, sobre manera, a Moscones en Xixón, que lleven el nome del so conceyu y lu dan a conocer ente los xixoneses con iniciatives mui prestoses como esti premiu o la Selmana Cultural qu’organicen cada añu en Xixón, con gran repercusión. Tienen amás, daqué que me presta enforma, un compromisu pa cola llingua asturiana que por desgracia nun ye lo que siempres atopa ún.

Convoquen esti concursu de periodismu, qu’agora mesmu ye l’únicu que n’Asturies permite presentar trabayos periodísticos n’asturianu. Y esto ye mui importante, pues el llabor de los periodistes que trabayamos la información na nuesa llingua tien munches torgues pel camín, y nun ta nada mal que de xemes en cuando se reconoza esi trabayu.

Les persones que facemos periodismu n’asturianu quixéremos que facelo fuera dalgo normal, que la llingua qu’emplegamos tenga una situación como la del castellán, pero anguaño nun ye asina. L’asturianu vive marxináu y arrequexáu a espacios mui determinaos y más nel ámbitu de los medios, y aprovecho esti foru, esti guapu espaciu de la Capiella los Dolores, pa reclamar una vegada más que l’asturianu seya oficial, la única posibilidá pa que les futures xeneraciones de moscones, d’asturianos, siguan teniendo esti ricu patrimoniu que ye la llingua aturiana.

Y Alcalde, tamién dende los conceyos pueden facese munches coses pol asturianu. Sé que se vienen faciendo nesti conceyu, pero han facese tovía más esfuercios dende tolos ámbitos. La situación del nuesu idioma precisa facer munchos más esfuercios si queremos garantizar el so futuru.

discursu1.jpg

Esti premiu ganáronlu enantes periodistes bien importantes qu’espublicen en medios llíderes n’Asturies y por eso tengo de valorar tamién qu’esti xuráu decidiera dar el premiu a un periodista mozu como yo y a un mediu dixital, Asturnews. Ye la primer vegada que se-y da un premiu a un mediu qu’apaez namás n’internet. Los tiempos cambien y la forma de lleer la información tamién, vese qu’esti premiu tamién ta colos tiempos que cuerren.

N’últimu llugar prestábame dar les gracies, otra vegada a Moscones en Xixón y tamién al Conceyu de Grau, por organizar un actu tan guapu pa esti día. Al alcalde por tar equí entregando esti premiu, a toos vosotros, por dexame participar güei d’esta Fiesta de la Primer Flor y por acompañame nun día tan especial pa min. Al Orfeón de Grau y a la Banda de Gaites Villa de Mieres por dexanos sentir la so música esta mañana. A quien m’acompañen dende Xixón y dende otros llugares, amigos, familiares, y si me permitís, nun día como’l de güei, Día de la Madre, mui especialmente, a mio madre, dedíco-y güei esti premiu.
Munches gracies a toos por esti día tan guapu en Grau que nunca voi escaecer y por esti premiu que quiero facer estensivu a tolos compañeros que faen periodismu n’asturianu.

Güei espero esfrutar con vosotroes d’estes prestoses fiestes de la Primer Flor nel vuesu conceyu. Munches gracies, Grau.

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.