El 1er Congresu d’Iniciativa pol Asturianu escueye a Inaciu Galán como presidente de la organización

Vítor Suárez sedrá vicepresidente, Rubén Martín-Llames, secretariu y Ana María Viesca Iglesias, ayalguera

25/02/2012. Iniciativa pol Asturianu celebró na tarde de güei, sábadu 25 de febreru, el so primer Congresu nel Auditoriu d’Uviéu. La votación de los socios dio como ganadora a la candidatura encabezada pol periodista Inaciu Galán (Xixón, 1986), que llevaba como vicepresidente al estudiante de maxisteriu y activista llingüísticu Vítor Suárez (Uviéu, 1988), xunto a ellos el tamién periodista Rubén Martín-Llames (Xixón, 1976) como secretariu y la profesora Ana María Viesca Iglesias (Piloña, 1959) como ayalguera.

Amás Xosé B. Álvarez, d’Uviéu, foi escoyíu Vocal de Rellaciones Internacionales, María Díaz Suárez, de Mieres, Vocal d’Enseñu, Sabel Tuñón Ces, de Xixón, como Vocal de Voluntariáu, Alex Ordiales, de Llangréu, ye agora Vocal d’Imaxe y Audivisuales y Denis Soria, de Xixón, Vocal de Dominiu Llingüísticu.

Nel congresu presentóse la Memoria de Trabayu 2011, onde s’esplica’l llabor fechu hasta’l momentu (sedrá colgada na web nos díes vinientes) Amás punxéronse les bases al trabayu de los meses vinientes cola aprobación d’una Fueya de Ruta presentanda pola candidatura ganadora, amás de cola asunción de responsabilidaes nos conceyos per parte d’otros socios, col envís de poner en marcha grupos llocales de trabayu que lleven la reivindicación llingüística a les cais y les insitituciones d’Asturies.

Iniciativa pol Asturianu ñació’l pasáu mes d’ochobre y tres dellos meses de puesta en marcha, presentándose’l 17 d’avientu nuna gala na Biblioteca d’Asturies, n’Uviéu. Dende entós vien poniendo la so voz na reivindación llingüística, denunciando casos de discriminación y llevando a cabu avances al traviés de la negociación, nos que destaca l’entamu nel usu de la toponimia asturiana per parte de la empresa de tresportes ALSA.

Galería de semeyes del Congresu

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.