ENTREVISTES 10 de xunetu de 2009 . Diariu El Comercio.
INACIU GALÁN. DIREUTOR REVISTA ‘FORMIENTU’
«Los llectores son el meyor termómetru del nuesu trabayu» El direutor de la revista ‘Formientu’ añuncia «un concursu de microrrellatos en diez pallabres col que queremos buscar talentos»
ENRIQUE CARBALLEIRA
La revista lliteraria ‘Formientu’ estrena nueva época con dellos cambios importantes, dende’l diseñu al conseyu de redaición. Inaciu Galán dirixe esta publicación col oxetivu d’echar un gabitu a los autores mozos que se tan convirtiendo yá nel presente y nel futuru de la lliteratura asturiana.
–Estos díes preséntase’l númberu cinco de ‘Formientu’. ¿Qué destacaría de los sos conteníos?
–Nesti númberu, como siempres, tentamos tar abiertos a propuestes lliteraries nueves. Autores qu’entamen y tienen na revista una oportunidá de dase a conocer y dir poniendo la so lliteratura énte’l güeyu llector, énte la crítica.
Estrénense nesti númberu Rubén Rey y Javier Cubero, amás d’abrir un espaciu pa les traducciones, nesti casu de lliteratura catalana.
–Tamos ante una nueva época de la revista. ¿Qué cambios se fixeron de cara a esti númberu?
–Dende’l númberu anterior, asoleyamos la revista en collaboración cola editorial La Cruz de Grau y vamos meyorando’l diseñu, en manes d’Andrés Alonso Moutas, que ta faciendo un mui bon trabayu. Amás, estrenamos equipu pal Conseyu de redaición.
–¿Qué se buscaba con estos cambios?
–Nel casu de la maquetación y el diseñu l’oxetivu ye pone-y a la lliteratura moza nel meyor envoltoriu posible, dalgo imprescindible pa llegar al llector. D’otra banda, el Conseyu de redaición nuevu vien a da-y puxu a la calidá lliteraria de la revista, daqué que tien una importancia vital nuna publicación.
Esti llabor d’esbilla de testos y de diálogu colos autores nótase yá nesti númberu.
–¿Quién forma’l conseyu de redaición?
–L’equipu ta formáu agora pola escritora y filóloga Laura Marcos, como coordinadora, César Santiago, l’editor de la revista, y Benxa Pérez, escritor. Amás yo, como direutor, participando tamién del procesu, anque nesi sen el conseyu tien una autonomía mui importante.
Camiento que caún ha tener llendaos bien los sos llabores, pa facer un bon productu.
–¿Tienen dalgún calendariu de publicación previstu? –La idea ye sacar dos númberos al añu, y vamos consiguiéndolo dende 2006, con momentos de más dificultá. Agora, y gracies al apoyu de la editorial, nun vamos tener problema pa caltener los tiempos establecíos y sacar un númberu p’hacia mayu y otru alredor de setiembre o ochobre.
–¿Hai dalguna temática pola qu’apuesten especialmente?
–Eso dexámoslo a la llibertá creativa de los autores. El nuesu oxetivu ye apostar pola calidá lliteraria y polos escritores emerxentes, que son el futuru de la lliteratura asturiana y qu’han dir evolucionando a poco y a poco.
–¿Cómo ve la evolución de ‘Formientu’, dende la so creación en 2006?
–Soi optimista sobre’l futuru.
Entamamos con pocos medios, maquetándola nós mesmos, distribuyéndola como podíes y pasu ente pasu fuimos meyorando, lo mesmo na estética que na calidá, como tamién na xestión de la distribución. Pa ello ye importante ser permable a les crítiques constructives y dir deprendiendo de les opiniones de los llectores, que son el meyor termómetru del nuesu trabayu.
–¿Formen un bon paisaxe lliterariu los autores mozos asturianos?
–Creo qu’hai una bayura d’autores bien importante, en ‘Formientu’ espublizamos obra de más de cuarenta autores ñacíos de 1975 n’adelantre y siguen apaeciendo nuevos escritores.
Con resultaos desiguales van apaeciendo llibros d’estos autores qu’amuesen que la evolución ye positiva. Nesi sentíu pamidea ‘Formientu’ ta siendo un bon campu de pruebes.
–¿Cree que tienen bastantes calces pa facer llegar la so obra a los llectores?
–Esforciámonos muncho, tanto Xareos! como La Cruz de Grau, pa dar a conocer el proyectu.
Presentamos la revista en munchos conceyos asturianos y eventos lliterarios, y tenemos una páxina web www.xareos.
com onde tentamos d’averanos al públicu al traviés de la rede. L’alministración echa un gabitu coles ayudes, pero abandona la promoción, en xeneral, de la lliteratura asturiana, y más de los autores mozos. Esta mesma selmana vamos convocar un concursu de microrrellatos en diez pallabres col que queremos llamar l’atención sobre la revista y buscar nuevos talentos.
–¿Ónde pue tar l’ésitu d’una publicación como esta?
–L’oxetivu cuando fundamos esta revista yera ser escaparate de la última fornada d’escritores en llingua asturiana, y nesi sen, creo que consiguimos l’oxetivu. De toes formes, l’ésitu ha tar en caltenese nel tiempu y saber ameyorar en tolos sentíos, según les circunstancies de cada momentu.