Apúrrovos esti artículu del escritor y miembru de l’Academia de la Llingua Asturiana, Vicente García Oliva, del so blogue Trabayu de Campu.
Tuvi esti día nel homenaxe que se-y fizo a don Emilio Robles Muñiz, “Pachín de Melás, con motivu del 75 cabudañu de la so muerte. L’actu taba organizáu poles asociaciones “Iniciativa pol asturianu”, que preside l’inquietu y trabayador Inaciu Galán, y “Ástura”, representada nesta ocasión por Xuan Pandiella, y cellebróse nos llocales del meritoriu Atenéu Obreru de Xixón, siempre abiertu, col espíritu fundacional, a los actos culturales asturianos y, como nesti casu, asturianistes.
Esti llevaba tola pinta de ser un actu cultural más, reivindicativu, como tien de ser, pues la cultura asturiana ye dalgo siempre a reivindicar y a tener presente, y más nestos casos en que, eso que se llama “les instancies oficiales”, “pasaron” del actu y del homenaxe, pero tuvimos la suerte de cuntar ellí cola presencia de la fía y la nieta d’Emilio Robles que fueron dalgo más qu’unes “figures decoratives”.
N’efeutu, Pilar, la so fía, una señora de 92 años que nun aparenta nin la metada, fue la verdadera protagonista del actu del Atenéu. Sobremanera, contaxándonos cola so emoción y les sos llárimes la llectura de la última carta escrita pol autor xixonés dende la carcel del Coto. Una carta, empobinada a la so muyer Agapita, que lleó’l representante de la Tertulia Pachín de Melás, Xelu Neira, nuna decisión que yo considero abondo desafortunada. Nun pue sometese a una señora de 92 años, qu’acude a un actu d’homenaxe en memoria de so padre, a la llectura d’un documentu d’esa mena. Un documentu tráxicu que pudo provocar dalgo más que llárimes nel corazón de la so fía. Pero Pilar, al marxe de les llárimes, reaicionó con una gran entereza. La mesma que tuvo cuando, de mou improvisáu, el presentador del actu, Inaciu Galán, invitóla a xubir al estráu a cuntar dalgunos recuerdos de so pá, entovía cola emoción nos güeyos. Ellí tuvo xenial, con memoria y un gran sentíu del humor, aprovechando pa enderechar dalgunos datos enquivocaos al rodiu de la vida de Pachín, como’l so llugar de nacencia (na cai Melquiades Álvarez), o los socesos que se produxeron alredor de los restos de Xovellanos que, tando na Ilesia de San Pedro, hubo que los rescatar enantes de que la dinamitaran, con un gran protagonismu del escritor xixonés qu’ella desplicó. Hubo, tamién, anéudotes y recuerdos infantiles y la verdá ye que fueron unos minutos prestosísimos y emocionantes, zarraos con una gran ovación a Pilar.
L’actu cuntó, amás, cola llectura d’unos testos del autor destacando, al mio xuiciu, la intervención del académicu de la llingua, Monchu Iglesias, que lleó ún mui prestosu dedicáu a “Nolón” (Perfecto Fernández Usatorre), cuando ésti vieno d’América probe y alcoholizáu. Un homenaxe, pues, prestosu y oportunu, al escritor bayurosu y al entamador d’iniciatives asturianistes, como la revista “Alma Asturiana”, o la Biblioteca de Autores Asturianos, ensalzáu pola presencia de la familia con una intervención importante de la so fía. Recordar, sicasí, que va unos pocos díes apaecía nel periódicu l’anuncia de que’l Presidente del Principáu, y el so séquitu, entrevistáronse en México con un nietu de Pachín de Melás, Germán Robles. Nun sé de qué falaríen na intimidá, pero l´únicu comentariu que punxeron en boca del Presidente fue: ””Eres el responsable de envenenar mis noches infantiles“, faciendo mención a los papeles de “vampiru” que Germán desendolcó na so carrera d’actor. Igual tamién falaron de Pachín de Melás, un de los escritores claves na lliteratura asturiana, pero eso nun lo ponía la prensa.
(La semeya del actu ye de Citoula, diariu El Comercio)