Noticia: Premiu Enriqueta Rubín 2005, avientu 2005

Inaciu Galán recibió’l Premiu Enriqueta González Rubín l’añu 2005

—————————————————————
El premiu de periodismu «Enriqueta González Rubín» convócase cada medios años. Les bases de la convocatoria de 2005 -la última realizada- puen consultase nel BOPA del 20 de xunetu del 2005

3.2. Premiaos nel 2005

Nel añu 2005 convocóse’l III Premiu «Enriqueta González Rubín» de periodismu, dotáu con 6.000 euros correspondientes a dos categoríes: a) Periodismu escritu, pa trabayos publicaos en periódicos y revistes (2.000 euros); b) Periodismu audiovisual, pa trabayos emitíos en radio o televisión (4.000 euros).
Un xuráu, formáu por Ramón d’Andrés Díaz (Xefe de la Oficina de Política Llingüística), Humberto González (escritor), Beatriz Redondo Viado (periodista) y Álvaro Ruiz de la Peña (escritor y profesor universitariu), y presidíu por Carlos Madera, Director Xeneral de Promoción Cultural y Política Llingüística, alcordó por unanimidá conceder:

1. El Premiu Enriqueta González Rubín de Periodismu escritu al artículu «Una historia de la mina poco conocida: el pieslle d’Antracitas de Gillón y la cuenca del Narcea», publicáu por CRISTOBAL RUITIÑA TESTA nel selmanariu Les Noticies el 15 de mayu del 2005.

Datos del ganador:
Cristobal Ruitiña (Cangas del Narcea, Asturies, 1977) llicencióse en Ciencies de la Información pola Universidá Autónoma de Barcelona. Entamó la so trayectoria profesional nos informativos de la emisora barcelonesa Ràdio Gràcia. Tres de pasar pela redacción d’Esport Nou, el web portal Telepolis y el diariu ABC en Cataluña -época na qu’algamó’l premiu de periodismu de la Fundación AENA por un reportaxe espublizáu nesti últimu rotativu-, nel añu 2000 incorporóse al Conceyu de Cangas del Narcea pa echar a andar la emisora municipal Radio Narcea. Ensin dexar esta responsabilidá, más tarde asumió la dirección global del Área de Comunicación del consistoriu. Dende mediaos de 2005 collabora nel selmanariu Les Noticies. Ye miembru de l’Asociación de la Prensa d’Uviéu.

2. El premiu Enriqueta González Rubín de periodismu audiovisual al programa númberu 11 de Asina foi… el Surdimientu, emitíu n’Onda Peñes, de Lluanco, el 11 d’abril de 2005 col títulu «Homenaxe n’alcordanza de Mánfer de la Llera». El director y presentador del programa ye INACIU GALÁN Y GONZÁLEZ.

Datos del ganador:
Inaciu Galán y González (Xixón, 1986) diose a conocer polos sos programes de radio «Xuventú d’anguaño» (2003-2004) y «Asina foi… el Surdimientu» (2004-2005), dambos na emisora comercial Onda Peñes. Amás d’ello, collabora col diariu lletrónicu Asturies.com y con Televisión Local Gijón (TLG), onde tien una sección selmanal de llingua y cultura asturianes.
Nel 2004 fundó, xunto a Benxa Pérez, H. A. Xareos, asociación que dende entós vien organizando actos culturales y d’ociu con un enfotu normalizador pa cola llingua, como’l «I Certame de Monólogu Modernu ¡Rite n’asturianu!».
Como poeta, tien espublizaos dellos testos en Lletres Asturianes, Reciella Malory, La Nueva Quintana y La Migaya. Como narrador algamó en 2004’l segundu premiu del II Certame de Microrrellatos Minimorum de La Voz de Asturias.

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.