“Pozu fináu”, nel llibru “Cuántu carbón saldría”

cuantu-carbon-saldria.jpgLa Xunta Xeneral d’Asturies, el parllamentu asturianu, espubliza un llibru cada Selmana de les Lletres Asturies como homenaxe al autor al que se-y dedica. Esti añu esi llibru llámase “Cuántu carbón saldría” y ta dedicáu a Mánfer de la Llera. Nél cuarenta escritores, d’estremaes xeneraciones y estilos lliterarios, apurrimos un microrellatu escritu n’asturianu o en gallego-asturianu. El pasáu 5 de mayu diputaos, conseyeros, y nesta ocasión hasta’l Presidente d’Asturies, dieron llectura a dalgunos de los testos del llibru. Apúrrovos el míu, tituláu “Pozu fináu”. Espero que vos preste.


Pozu fináu

Dempués de tantos años sintiendo a mio pá falar d’aquel llugar nel que l’actividá nunca nun paraba, onde siempres yera de nueche pero se trabayaba como de día, ver aquel mundu quietu de fierros y escombros provocóme una fuerte impresión. Les vagonetes ferruñoses recordaben, como llábanes nel cementeriu, qu’ellí achucaba un oficiu, una forma de vida, qu’ellí onde’l trasiegu yera continuu, vivía agora’l silenciu. La entrada a la mina fendiere, camiento que cansada de nun sirvir pa nada y les oficines paecíen esperar la llegada de les secretaries de la compañía d’un momentu a otru, como ensin asumir la realidá, como ensin cayer na cuenta de que nunca nun tornaríen.

Inaciu Galán y González

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

Dexar un comentariu

La to cuenta de corréu nun va espublizase.