Inaciu Galán, periodista y escritor, dará llectura esti miércoles a les 17:30 hores, a una conferencia sobre la hestoria de la publicidá en llingua asturiana dientro de les XXXI Xornaes Internacionales d’Estudiu qu’organiza l’Academia de la Llingua Asturiana en collaboración cola Universidá d’Uviéu.
Na conferencia, titulada “Delles aportaciones pa una hestoria de la publicidá n’asturianu”, l’autor va facer un repás pelos exemplos atopaos na prensa de publicidá escrita n’asturianu. El primer exemplu remóntase al sieglu XIX. Nel añu 1867 apaez esti primer anunciu, en forma de poesía.
Más rico que rica miel
y antídotu del splin,
echa’l sábadu un tonel
La Quesa en Villamanín.
Non dudo qu’acudirá
De Xixón el pueblu enteru,
Y contentu bailará
Y na casa del Xoveru
Pel tarreñu beberá.
Dende entós decenes d’exemplos de publicidá n’asturianu pasaron pelos periódicos d’Asturies y d’otros llugares, como nos países onde había una fuerte presencia d’asturianos, n’América, o en publicaciones de fuera d’Asturies que queríen mostrar la procedencia del productu usando l’asturianu como seña d’identidá. Ente los más conocíos, el del papel de fumar La Panoya (del qu’acompañamos exemplu).
En total van presentase más de 50 exemplos d’anuncios asoleyaos en prensa ente 1867 y 1977, comentando les característiques y faciendo por sacar conclusiones d’un periodu nel que l’asturianu vivió momentos políticos mui distintos. Destaquen, ente los anuncios que se van presentar, un 40% fechu pola hostelería, con un altu porcentaxe dedicáu a la sidra, un 33% de comercios y un 17% d’alimentación y bebíes, un 10% sedría pa otros exemplos, ente los que destaquen anuncios de llexía, de 1924, que tamién usen esti idioma pa espresase.
Inaciu Galán (Xixón, 1986) ye periodista y escritor. Presidente d’Iniciativa pol Asturianu, anguaño remata la tesina del Máster en Sociedá de la Información y el Conocimientu na UOC. A lo llargo e más de cinco años presentó’l programa Xente de casa, na TPA, amás de trabayar n’otros medios como la Cadena Ser o’l diariu dixital Asturnews. Director de la revista lliteraria Formientu, autor del Diccionariu Asturianu-Inglés/Inglés-Asturianu y d’otros llibros n’asturianu, tien asoleyaos tamién numberosos artículos d’investigación y ensayu alredor de la hestoria de la llingua y la lliteratura asturianes.
Fonte: Búscolu
%2013.22.16_f6c55f.png)
