Inaciu Galán y Jorge Fernández protagonicen los alcuentros lliterarios d’esta selmana en Corvera
L’eventu ‘Veranu Lliterariu’ entama la so segunda selmana d’actividá cola participación de Inaciu Galán y Jorge Fernández. Estos alcuentros con escritores que tienen llugar en Corvera van allargase hasta’l 4 de setiembre.
El martes, Galán va falar de ‘Nel, el coríu que nun sabía esnalar’ na Biblioteca de Les Vegues, mentes que Fernández va facer lo propio con ‘El lladrón de galletes’, cuentu escritu xunto con Amparo Elena Sarrión, el xueves nel Centru Sociocultural de Les Vegues. Les dos visites al conceyu de los escritores van celebrase ente les 11.30 y les 12.30 hores. L’asistencia a los alcuentros colos escritores ye de baldre.
Está actividá entamada pola Casa de la Llingua y el Conceyu de Corvera principió la selmana pasada cola participación de Sidoro Villa, Chechu García y María Luz Pontón, y va continuar coles visites d’otros destacaos escritores asturianos: Xulio Berros (21 d’agostu), Berto García (22), Antón García (23), Iris Díaz Trancho (28), Cristina Muñiz (29), Severino Antuña (30) y Ramón Lluis Bande (4 de setiembre).
Fonte: Asturies.com http://asturies.com/noticies/inaciu-gal%C3%A1n-y-jorge-fern%C3%A1ndez-protagonicen-los-alcuentros-lliterarios-d%E2%80%99esta-selmana-en-co
Participación en «Timba poétika» en Cangas del Narcea
La Timba Poetika en Cangas del Narcea va celebrase nel Pub Bambú, asitiáu na cabeza del conceyu. Nesta ocasión van participar Pablo X. Suárez, Laura Marcos, Bitter Vitor, Cristina Menéndez, Pablo Rodríguez Medina, Inaciu Galán y Miguel R. Monteavaro. Amás, darréu habrá micro abiertu pa tolos que s’animen a compartir la so lliteratura.
Participación nos alcuentros con escritores en Corvera
Dende’l martes 7 d’agostu al martes 4 de setiembre una docena d’escritores asturianos van tar en Corvera nel marcu de l’actividá «Veranu lliterariu. Alcuentros con escritores en Corvera», iniciativa que busca acercar y dar a conocer una muestra de la producción lliteraria n’asturianu dirixida al pública infantil, mesmo qu’a los sos autores.
Asina les coses, y al traviés de «Veranu lliterariu. Alcuentros con escritores en Corvera» -ye la primer vez que se fai una actividá d’estes característiques nel conceyu-, van visitar Corvera los y les escritores Sidoro Villa, Chechu García, M.ª Luz Pontón, Inaciu Galán, Jorge Fernández, Xulio Berros, Berto García, Antón García, Iris Díaz, Cristina Muñiz, Severino Antuña y Ramón Lluis Bande.
L’actividá, llibre y gratuita, ta dirixida a los/es neños/es d’ente 4 y 10 años, y va facese n’horariu de 11:30 a 12:30 hores na Biblioteca de Les Vegues, sacántenes los díes 16 y 28 d’agostu que por mor de cuestiones técniques va desarrollase nel salón d’actos del Centru Sociocultural de Les Vegues.
Intervención na presentación del llibru de Xurde Morán
Presentación del llibru de Xurde Morán
Camín de Xixón a Cuadonga
C.C. Los Fresnos, Xixón – 26 de xunetu de 2012
Inaciu Galán y González
Mui bones a toos:
Préstame abondo que Xurde Morán cuntará conmigo pa presentar esti llibru. En primer llugar porque-y tengo un apreciu personal, porque ye un paisanu, un home col que se puede cuntar cuando lu necesite, y que ye cumplidor, virtú que nun abonda muncho nesta Asturies nuesa.
Conocílu va un piñu d’años (en persona, porque pela tele conociémoslu toos cuantayá) y recuerdo como cuando presenté’l mio primer llibru, tenía yo unos venti años, Xurde Morán, al qu’entá conocía namás que de compartir unes botelles en chigre nunes poques ocasiones, presentóse a apoyame y fízome muncha ilusión entós, como güei ilusióname poder dicir unes pallabres nesta presentación.
Continue reading «Intervención na presentación del llibru de Xurde Morán»
Entregando l’informe a la Real Academia Española
El pasáu llunes 4 de xunu, y como presidente d’Iniciativa pol Asturianu, tocóme dir a la sede de la Real Academia Española (RAE), en Madrid, pa presentar en mano énte la RAE l’informe tituláu «Definir el términu «asturianu» con xeitu. Informe sobre la presencia del vocablu «asturianu» y otros términos nos diccionarios normativos d’otres llingües». Trabayamos pa que se cambie la definición d’asturianu, qu’entá apaez como «dialecto» nesti diccionariu de referencia. Equí ta la noticia recoyida pola TPA.
[youtube http://www.youtube.com/watch?v=HmrDDDShMpo&w=560&h=315]
Esta ye, de momentu, la única contestación:
http://www.ivoox.com/playerivoox_ep_1282395_1.html Ir a descargar
L’ALLA tien nes llibreríes el cuartu númberu de Lletres Lliterariu
La revista Lletres Lliterariu, que ñació como númberu especial de Lletres Asturianes y lleva cuatro años como publicación dixebrada, asoleyó’l pasáu mes de mayu un númberu nuevu. Nesti cuartu númberu l’Academia sigue col enfotu de contribuir a festexar la virtualidá estética del nuesu idioma, que dende hai sieglos vien dándonos obres de calidá induldable. Nesti volume puen atopase obres de poesía, narrativa, teatru y tornes.
Esti númberu cuatro inclúi poemes de Xuan Porta, Lauren García, Marta Mori, Xurde Fernández, Cristina Menéndez Martín, David Fernández, Roberto González-Quevedo, Xicu Monteserín, Manuel Asur, Ricardo Saavedra Fernández-Combarro, Marisa López Diz, Irma González-Quevedo Pedrayes, Inaciu Galán y González, Xe M. Sánchez, Mª José Fraga Suárez, Helena Trexu Fombella, Abel Aparicio González, Berto García, Ángeles González Fuentes, Carmen Uría Araujo, Pachu Menéndez, Ánxel Álvarez Llano, Mª Esther García López y Santi Fano, qu’ilustra amás esti volume.
Na estaya de prosa espublízase “El silenciu”, de Berto Cobreros, “Cuentos pequeñinos” de Vicente García Oliva, “La bona intención” y “Una onza de chicolate”, de Xosé Bolado, “Chicolate”, de Xurde Fernández, “Fuzzy logic”, de Xe M. Sánchez, “Cuidáu cola tragancia”, de Xulio Arbesú, “Col meyor vistíu”, de Cristina Menéndez Martín, “Pyrus communis”, d’Inaciu Galán y González, “A moza d’Agapito”, d’Aurora García Rivas, “El falante”, “La lletra” y “La llingua tarazada”, d’Ánxel Nava, “Milagros”, de Marisa López Diz, “Acuicultura” d’Helena Trexu, “Les llarasques de felechu”, de Xosé Ramón Lozano Cuervo, “Diariu”, de Carlos Rubiera Tuya y “La ferrería”, de Lluis Muñiz Antuña.Continue reading «L’ALLA tien nes llibreríes el cuartu númberu de Lletres Lliterariu»
Entama «Iniciativa pol Asturianu nes ondes»
Convídovos a sentir el nuevu programa «Iniciativa pol Asturianu nes ondes», dirixíu por Samuel Gradín. Falé con él nel primer programa que coincide colos seis primeros meses de l’actividá pública d’Iniciativa pol Asturianu.
[youtube http://www.youtube.com/watch?v=CCN-Yv0Qc_Y&w=420&h=315]
Y equí puede sentise’l programa completu:
«Los asturianos quieren que la so llingua tenga futuru»
«Los asturianos quieren que la so llingua tenga futuru» ENRIQUE CARBALLEIRA
L’escritor y periodista Inaciu Galán y González (Xixón, 1986) allégase estos díes por primer vez a la lliteratura pa neños col llibru ‘Nel, el coríu que nun sabía nalar’. Galán, que tá nestos momentos al frente de la plataforma ‘Iniciativa pol asturianu’, destaca’l papel que tienen les escueles pal caltenimientu de la llingua y recuerda dalgún de los llogros d’estos últimos meses a la hora de normalizar el so usu. –‘El coríu que nun sabía nalar’, ¿tamos ante una hestoria de superación? –En ciertu mou, sí. Nel ye un coríu que nun s’adapta, que ye distintu a los que lu arrodien, nesti casu porque nun sabe nalar, pero la causa de la so marxinación podría ser otra cualesquiera. Por desgracia munchos neños pásenlo mal nes escueles por ser distintos, y esta quería ser una hestoria na que se mostrara de forma positiva cómo ye posible superalo. Pero Nel nun ye namás una víctima, tamién deprende de los sos erros nel camín. |
Antón García fala del llibru Más monólogos… ¡Pa echar unes rises!
EL TONU ASTURIANU
Más monólogos… ¡Pa echar unes rises!
II Antoloxía del monólogu modernu
Esbilla y entamu d’Inaciu Galán y González
Varios autores
Uviéu, Trabe, 2011
Nel 2002 Ediciones Trabe echaba a andar la so aventura de publicar lliteratura n’asturianu pa quioscos cola colección “Maestros del humor”, una iniciativa que quería recuperar los textos que los siguidores de los monologuistes llevaben años pidiendo. Delestal, Anxelu, Fabricio, Quevedo, Ago, Cuesta, Burgos, Campo, Ciaño, Torniello, Sarandeses… fueron dalgunos de los autores “clásicos” rescataos, xunto a otros actuales, como Adolfo Camilo Díaz, Pin de la Cotolla, Cellero, El Maestru, Tino’l Rufo, Xuan d’Amandi, Albalá o Lado. Foi una aventura comercial de manual: a midida que se poníen a la venta los nuevos númberos de la colección, diben menguando les ventes esactamente na proporción prevista pol distribuidor pa esti tipu de llanzamientos. Anque nun resultara un éxitu mercantil, permitió reconciliar al públicu tradicional de la lliteratura nesta llingua col procesu de recuperación cultural, al tiempu que se rindía homenaxe al más popular de los subxéneros lliterarios asturianos con ediciones acuriosaes, en tapa, nes que se procuró evitar los textos que denigraben a les muyeres (los que fain apoloxía de los malos tratos, por exemplu).
Unos pocos años más tarde, cásique como continuación lóxica, la TPA producía un breve espaciu d’humor que se titulaba “La Risión”, nel que s’asomaba a la pantalla esti humor tradicional (Anxelu, Delestal…), anque nel programa lo habitual foi contar con nuevos autores que dieron un aire mui distintu al monólogu asturianu. De mano, si exceptuamos a Pin de la Cotolla o a Min de les Pieces, que caltienen la fidelidá a la tradición propia del versu, la mayor parte de los autores quixo más los textos en prosa. Foi’l casu de Cristina Muñiz, Tante Blanco, El Maestru, Vanessa Peña, José Ramón Oliva, Alberto Ramos o Marta Rodríguez, por exemplu. Quiciabes l’horariu de mañana nel que s’emitía aquel programa nun resultara la hora más aparente pa esti xéneru, que parez riquir la nueche, pero llogró mantenese perriba de los niveles medios d’audiencia de la cadena.
A iniciativa d’Inaciu Galán, que yá preparara en 2008 otra de les mesmes característiques, recupera Trabe nesta segunda antoloxía, Más monólogos… ¡Pa echar unes rises!, dalgunos de los textos que s’usaron naquel programa, firmaos pol propiu antólogu y por otros autores como Lluís Antón González, Azucena Álvarez, Silvino Torre, Carlos Briansó, Sara García, Carlos Alba, José Luis Piquero, Montserrat Garnacho, Alberto Suárez o Sixto Cortina. Permiten ver el feliz estáu del humor n’asturianu: renovación de temes, variedá d’estilos, entrada de la perspectiva de xéneru nun humor que parecía acotáu a los homes… Pero ensin perder lo qu’Emilio Alarcos definía como tonu asturianu: una mistura d’humor irónicu, malencolía, sobriedá expresiva y natural profundidá.