Poldo Galán Braña (Llastres, 1923 – Xixón, 2011)
Ayeri, miércoles 18 de mayu de 2011, dexónos mio güelu Poldo a piques de cumplir 88 años. Ñació nel pueblín marineru de Llastres (Colunga) en 1923 y tuvo siempres venceyáu a la mar pola so familia y el so trabayu, viendo nuna casa del Puertu d’El Musel, onde trabayaba’l so padre, y más tarde como trabayador de la Casa del Mar, onde se xubiló a finales de los años 80. Dende entós pasó munchos años cuidadando a mio güela Nedina, hasta la so muerte en 2005 dempués d’una llarga enfermedá. De magar esi momentu hasta ayeri tuvo la suerte de vivir unos últimos años con salú y allegría, pa dar paseos, tar al tantu de l’actualidás (llegaba a lleer 3 y 4 periódicos diarios), visitar Llastres (la so pasión) y compartir munchos díes colos sos fíos y ñetos.
Equí vos dexo una de les últimes semeyes que-y saqué col móvil, el 20 d’abril, cuando xintamos xuntos, él y yo solos, nun chigre de Mareo, en Xixón.
Esti xueves va facer el so últimu viaxe, el so cuerpu va pa Ciares pa compartir espaciu cola so querida Nedi, dempués d’una ceremonia na Ilesia de San Xosé de Xixón, a les 13 hores. Voi echalu muncho de menos.
Esta otra semeya préstame especialmente pol so amor por Asturies y pola so llingua, ye de 2010.
Mánfer de la Llera: l’home que se fixo ponte
El llibru biográfico, ‘De la rampla a la pluma’, se distribúi güei con motivu del Día del Llibru
(D’El Comercio 06/05/2011)
Manuel d’Andrés Fernández (Les Cuestes, Ciañu, 1918-Xixón, 2005). Por elección, l’escritor Mánfer de la Llera, al que nesti añu 2011 se-y rinde homenaxe, dedicándo-y los actos conmemorativos de la XXXII edición de la Selmana de les Lletres Asturianes. ¿Qué se puede dicir del autor de llibros como ‘Cabalgando sol tiempu’ o de les interesantes memories ‘Coses vivíes’? De mano, podíemos empezar por que los fechos tienen les sos causes y les causes tamién atienden a fechos. Por esta razón, pa comprender el significáu d’un home hemos de retrotraenos a les sos circunstancies. Y por eso hemos tamién de pensar nos momentos visiegos y de secañu que padeció la tierra nel sieglu XX.Continue reading «Mánfer de la Llera: l’home que se fixo ponte»
Discursu d’Inaciu Galán nel Premiu de Periodismu «Moscones en Xixón»
DISCURSU ENTREGA
PREMIU DE PERIODISMU “MOSCONES EN XIXÓN”
1 de mayu de 2011 – Capiella los Dolores – Grau
Inaciu Galán y González
Sr. Alcade, Conceyales, demás autoridaes, miembros de Moscones en Xixón, amigos y amigues:
Nun día nel que’l Conceyu de Grau y l’asociación de Moscones en Xixón m’ufren tantos honores y afalagos nun puedo tar más que satisfechu y agradecíu pa con esti conceyu, pa con tolos moscones. Y al escribir esti discursu, púnxime a pensar, ¿qué puedo cunta-yos yo a los collacios de Grau pa nun los aburrir demasiao? Y pensando, dándo-y vueltes a la cabeza… ¿cuál yera’l primer recuerdu que tenía de Grau?
El primer recuerdu que tengo de Grau ye de cuando yera mui mui neñu. Mio güelu participara na construcción d’un edificiu, equí na villa de Grau, y vinimos a visitalu. Esperándolu diome por xugar col mecheru esti que traen los coches y… fatu que yá yera entós, quemé un deu, col consiguiente drama familiar, tantu drama qu’entá recuerdo aquel día, y yera mui pequeñu. La mio rellación con esti conceyu nun entamó mui bien, digamos que taba un pocu quemáu con Grau. La bona noticia ye que dende entós la cosa nun fizo más qu’ameyorar.
Continue reading «Discursu d’Inaciu Galán nel Premiu de Periodismu «Moscones en Xixón»»
Discursu na entrega del Premiu de Periodismu «Moscones en Xixón»
(Del blogue de Cultura de Grau)
El pasáu domingu, día 1 de mayu, celebróse l’actu d’entrega del Premiu Periodísticu Moscones en Xixón que nesta edición recayó en Inaciu Galán pol trabayu «Grau, el mercadón de la cultura», un reportaxe espublizáu pol diariu Asturnews nel añu 2010 y del que ye autor . Anque’l certame ta abiertu a obres en castellán y n’asturianu, esta ye la primer vegada que’l premiu va pa un trabayu redactáu n’asturianu nos siete años de vida del certame. Amás, Asturnews ye’l primer mediu dixital que recibe esti gallardón.
Nel artículu premiáu Galán repasa les estremaes iniciatives y actividaes culturales que se desenrrollen en Grau «una montonera d’iniciatives culturales que trescienden del ámbitu moscón pa convertise nun focu d’emisión de cultura pa toa Asturies y pal restu del mundu», en pallabres del propiu autor.
El premiu, convocáu pola asociación Moscones en Xixón ta dotáu con 1.200 euros.
Alfredo Huerta, Presidente de Moscones en Xixón, Inaciu Galán y el Alcalde de Grau, Antonio Rey
Inaciu Galán
Diplomáu en Turismu y Especialista en Xestión Cultural pola Universidá d’Uviéu, anguaño remata los sos estudios de Periodismu, amás de trabayar como redactor d’Asturnews, Inaciu Galán (Xixón, 1986) presenta’l programa “Al aldu: Xente de casa”, na TPA, dirixe’l departamentu de comunicación y prensa d’una empresa asturiana del sector de la moda y tien collaborao dende 2003 en medios como la Cadena SER, TLG, Asturies.com, Onda Peñes… Nesta última emisora dirixó dende 2004 a 2006 el programa “Asina foi… el Surdimientu”, pol que recibió’l Premiu de Periodismu Enriqueta González Rubín en 2005.
Esti vienres 6 de mayu, a les 19:30 manifestación pola oficialidá de la llingua asturiana
Un añu más la cai Uría d’Uviéu conviértese nel centru de la reivindicación llingüística asturiana. A les 19:30 hores voi participar na manifestación pola oficialidá del asturianu, que va salir de la estación de tren d’Uviéu, percorriendo la cai Uría hasta les puertes del Teatru Campoamor. Yá dientro del teatru uvieín, l’Academia de la Llingua Asturiana organiza la so tradicional Xunta Estraordinaria, col nomamientu del filólogu lleonés José Ramón Morala como Miembru d’Honor de l’ALLA y la reconocencia a la figura del ex ciclista Chechu Rubiera “pol so llabor d’encontu a la llingua y cultura del País”, amás d’actuaciones musicales. ¡Vémonos n’Uviéu!
[youtube http://www.youtube.com/watch?v=9Chupj5kfms&w=560&h=349]
Semeyes de la entrega del Premiu de Periodismu «Moscones en Xixón»
Pueden vese nel mio perfil en Premiu de Periodismu Moscones en Xixón (LNE, 2 de mayu de 2011)
V. DÍAZ PEÑAS
[…]
De manera paralela a la celebración del mercado de la Primera Flor, la villa moscona acogió otros actos que complementaron la jornada festiva. La asociación Moscones en Xixón, presidida por Alfredo González Huerta, entregó el premio del séptimo certamen periodístico que lleva el nombre de la agrupación. El alcalde, Antonio Rey (PP) fue el encargado de entregar el galardón a Inaciu Galán, premiado por su trabajo «Grau, el mercau de la cultura». En el marco del cuarto certamen de la faba asturiana se concedió el primer premio en la modalidad de faba granja asturiana a la finca El Cabillón. Y como no podía ser de otra manera, las gaitas tampoco faltaron.
Fonte: La Nueva España
Folletu entrega del Premiu de Periodismu Moscones en Xixón
Inaciu Galán, redactor d’ASTURNEWS, recibe esti domingu 1 de mayu’l Premiu Periodísticu “Moscones en Xixón” por “Grau, el mercadón de la cultura”
El xuráu del VII Certame Periodísticu “Moscones en Xixón” decidió otorgar el gallardón d’esta edición al trabayu «Grau, el mercadón de la cultura», un reportaxe espublizáu pol diariu ASTURNEWS nel añu 2010 y del que ye autor Inaciu Galán y González. Esti domingu 1 de mayu va producise na villa de Grau la entrega.
A les 12:30 de la mañana va entamar l’actu d’entrega cola actuación del Orfeón de Grau, pallabres del premiáu, del presidente de Moscones en Xixón, don Alfredo González Huerta, y del Alcalde de Grau, don Antonio Rey González. Finalizáu l’actu, el galardonáu y el restu d’asistentes sedrán recibíos pola Banda de Gaites Villa de Mieres, sirviéndose darréu un pinchéu a los asistentes a la entrega d’esti gallardón periodísticu dotáu con 1.200 euros.