Centru Asturianu de Madrid, 11 de xunu de 2016
Inaciu Galán, presidente d’Iniciativa pol Asturianu
Bones tardes:
Güei fiximos equí, nel Centru Asturianu de Madrid, un homenaxe a les nueses Lletres, un homenaxe a los y les escritores que fixeron y y faes guapes creaciones cola nuesa llingua.
Esti Día de les Lletres Asturianes en Madrid que dende Iniciativa pol Asturianu organizamos col envís d’axuntar a tanto asturianos que viven equí en Madrid pero que nun quieren escaecer la so llingua, la so cultura, esta seña d’identidá que ye pa nós l’asturianu. Esti día, ye un día de celebración, pero tamoén de reivindicación.
Axuntámonos pa da-y voz a esti idioma de nueso, tantes vegaes enmudecíu, pola falta d’un apoyu decidíu, con un enfotu real, per parte de les alministraciones. Esti idioma, sicasí, sigue vivu, sigue alenando, con puxu, gracies al compromisu de munchos y munches falantes lleales que tomen la decisión de nun dexar de falar la llingua de casa, poles miles de families que matriculen a los sos fíos na asignatura de llingua asturiana cada añu, por tantos que deciden recuperar o deprender l’idioma, asturianos y nuevos asturianos que lleguen a Asturies y quiersen sumase como falantes activos de la llingua propia del pueblu que los acueye.
Por too ello ye polo que trabayamos dende Iniciativa pol Asturianu y otros munchos colectivos y persones que nel so día a día dicen non al desaniciu la que dalgunos quieren condergar a la nuesa llingua. Dellos, trabayando con nós en campañes, reivindicando, otros simplemente usando la so llingua, la meyor reivindicación que se pue facer en tolos ámbitos.
Nun queremos que naide sienta vergoña de falar la so llingua propia, esiximos que los nuesos drechos se vean reconocíos, tal y como lo esixen a los nuesos gobiernos instituciones internacionales como les Naciones Xuníes, el Conseyu d’Europa o la UNESCO. Y tal y como reclamamos miles d’asturianos y asturianes cada añu y cada día.
Esiximos respetu a los falantes más vulnerables, aquellos que falen d’una mena cásique inconsciente en munchos casos, los nuesos güelos, a los que-yos metieron na cabeza l’autoodiu y los falsos prexuicios sobre la so forma de falar. Esto fixo que munchos dexaren de tresmitir l’asturianu a los sos fíos y ñetos. Romper estes dinámiques, recuperar l’autoestima de los falantes, garantizar les midíes pa que la tresmisión xeneracional se produza, eses son les nueses reivindicaciones: respetu al idioma y reconocencia de los Drechos amparaos pola Constitución y la Declaración Universal de los Drechos Humanos, lo que pasa nel marcu actual pola declaración d’oficialidá pal idioma.
Nun podemos esperar más, esta llingua milenaria tien que de valir pa muncho más que pa tener pola pantalla del ordenador del presidente d’Asturies.
Y nun podemos esqueicer que n’Asturias temos duas llinguas propias, el asturiano y el gallego-asturiano que se fala na zona mais occidental del país. Temos que sentir úa y outra como nosas y protexerlas y quererlas ás duas.
Axuntámonos equí, celebramos el Día de les Lletres Asturianes y con ello celebramos la nuesa cultura, les nueses llingües, faemos porque esta llingua tan desconocida pa munchos n’España, seya más conocida equí en Madrid, respetada y apreciada n’igualdá de conodiciones coles demás, pa que mos tengan en cuenta los nuesos represenantes políticos ya institucionales.
Gracies por compartir tantos guapos testos de les nueses Lletres Asturianes nesti actu.
Puxa les Lletres Asturianes, Puxa la Llingua Asturiana, Puxa Asturies.
