Na política asturiana (si ye que podemos falar de “política asturiana” al referinos a los partíos centralistes) esiste una llarga tradición pola que los políticos faen de nueso los problemes de los demás de forma artificial. Una forma más de sucursalismu pola que los conflictos qu’apaecen en Madrid, Barcelona o Sevilla, por exemplu, conviértese de sópitu en verdaderos problemes “regionales”. Camiento que los políticos asturianos de PP y PSOE nun faen más que repitir como papagayos los discursos escritos dende Madrid. Y agora súmense otres fuercies como UPyD.
L’últimu d’estos problemes “importaos” lleva tiempu ruxéndose, y agora’l PSOE llanza un globu sonda: acabar col ordenamientu tradicional d’Asturies, axuntando conceyos, nun sé sabe mui bien con qué criterios, nuna especie de Decretu de Nueva Planta d’anguaño. Una forma bien guapa de poner el ramu a 12 años d’arecismu dexando güelga hasta na ordenación hestórica d’Asturies.
Y esta ocurrencia xustifíquenla polos problemes qu’esisten nos conceyos menos poblaos (los asitiaos fuera de la fastera central) pa da-yos servicios a los ciudadanos, cuando lleven décades quitando escueles rurales, llinies d’autobús, etc. Elementos toos ellos esenciales pa caltener la población nes fasteres rurales.
La media d’habitantes por conceyu nel estáu español ye de 5.791 habitantes por conceyu, baxando en comunidaes como Castiella-La Mancha hasta los 2.281. ¿Ye una llocura entós la media asturiana de 13.898 habitantes por conceyu? Nun lo paez. Somos la 5ª comunidá autónoma con una media más alta, y eso cuntando con casos tan especiales como Madrid y les islles canaries y baleares per delantre. Polo que’l casu de nueso nun paez tan grave.
La propuesta d’UPyD pa l’ordenamientu de los conceyos, presentada esti día n’El Comercio como aplicable n’Asturies lleva a tal absurdu, que tendríen de crease nuevos conceyos n’Asturies, pues proponen un mínimu de 5.000 habitantes. Bien, Asturies supera’l doble d’esi cupu imaxináu por Rosa Díez, gran conocedora de la nuesa realidá xeográfica y social.
Y si comparamos con otros países del estáu ye poca cosa, podemos comparanos con Suiza, onde tienen una media de 2.636 habitantes por conceyu (dempués d’una fuerte reducción), o Francia, con tovía menos, 1.800 habitantes de media. Y claro, ye bien sabío, qu’estos estaos son muncho menos ricos que l’español.
A ver si va ser qu’esto de los conceyos ye otra hestoria más pa echá-y la culpa de los problemes económicos d’Asturies non a los sos xestores, sinón a les cuases naturales, como enantes se fizo col “tradicional asilamiento de nuestra región”.
Nun son problemes de los conceyos despoblaos les polítiques llevaes alantre por PSOE-IX, col sofitu del PP, pa convertir les ales del país n’ermos económicos y darréu demográficos, el problema ye qu’unos pocos conceyos asturianos tienen menos habitantes de los que camienten afayadizos, non. Tampoco nun tien nada que ver, la xestión qu’alcades socialistes y populares vienen faciendo nos últimos trenta años, ¡qué va!.
Y nun se confunda naide, nun toi a la escontra de la collaboración ente los conceyos pal meyor serviciu de los ciudadanos, como se vien faciendo coles mancomunidaes y comarques asturianes dende va años, y creo qu’estes polítiques pueden reforciase. Sicasí, nun veo la necesidá d’acabar cola personalidá d’unes instituciones con sieglos d’hestoria. Quiciabes lo que falla ye l’aplicación del modelu de Les Cuenques defendíu estos díes por Javier Fernández, heriede d’Areces, como aplicable pa toa Asturies, como “un ésitu”
Pamidea esti ye un primer pasu pa entamar darréu (si cuela esta iniciativa) cola “fusión” de les comunidaes autónomes más febles, ente les que tamos. Por eso-yos presta esta idea a los d’UPyD. ¿Qué más da qu’Asturies seya un país milenariu? Igual ye más rentable xuntanos a Castiella o qué sé yo, ser una provincia madrilana, si ye que nun lo somos yá.
Y a la hora de ponese sueldos, de dase coches oficiales y dietes, millones pa los grupos parllamentarios y los partíos, ehí nun falta nunca un duru pa enchufar a otru más: ¡Será por perres!
*Axunto esta pequeña tabala de creación propia, que fici colos datos oficiales de conceyos y habitantes de cada comunidá autónoma, y qu’amuesa la media d’habitantes por númberu de conceyos de caúna:
MEDIA HABITANTES/CONCEYU
—————————————————
C. de Madrid————–36.008
Rexón Murcia————32.144
Islles Canaries————23.909
Islles Baleares————17.116
Asturies——————-13,898
Andalucía—————–10.796
Comunidá Valenciana—9.399
Galicia———————-8.876
País Vascu—————–8.654
Cataluña——————-7.933
Cantabria——————5.802
Media estáu—————5.791
Estremadura————–2.863
Navarra——————–2.318
Castiella-La Mancha—–2.281
Aragón———————1.840
La Rioxa——————-1.838
Castiella y Lleón———-1.136
Ye tremendo. Supongo que lleísti les declaraciones del profesor Arango, un economista al qu´había que ponéi el nome de “Profesor Muerte”, porque ye la Muerte de la Ordenación Tradicional Astur del Territoriu:
http://carlosxblanco.blogia.com/2010/110801-ya-tienen-pensada-la-solucion-final-pa-colo-asturiano..php
Esto ye Etnocidiu puru.
Lleílo y abluqué, sí Carlos. Ye terrible en manes de quien ta esti país.