Noticia: La Conseyería de Cultura entregó ayeri los premios añales a la creación lliteraria y periodística en llingua asturiana.

Asturies.com, 16 d’avientu de 2005

——————————————————————-
ENTE LOS PREMIAOS TUVO INACIU GALÁN, COLLABORADOR D’ASTURIES.COM

premios05.jpg

16/12/2005 Ismael María González Arias cola so novela “L’alcordanza del agua” algamó’l Xosefa Xovellanos de Narrativa, mientres que Xabiero Cayarga foi’l ganador del premiu Xuan María Acebal de Poesía pol poemariu “Les llingües de la hidra”. Nos premios de periodismu “Enriqueta González Rubín” que se dixebren nuna estaya pa periodismu escrito y otra d’audiovisual los ganadores foron el periodista de Cangas del Narcea Cristóbal Ruitiña y el collaborador d’Asturies.com Inaciu Galán que llevó’l premiu pol so especial radiofónicu dientro del espaciu “Asina foi..el Surdimientu” sobre’l fallecimientu del escritor Mánfer de la Llera, un programa qu’apaeció na so versión escrita nel so día al traviés d’Asturies.com.

Ente los premiaos rescampla’l casu d’Ismael González Arias que repitió premiu al facese col Xosefa Xovellanos de Novela dempués de ganar l’añu pasáu l’Enriqueta González Rubín de periodismu por un artículu sobre la canción asturiana. El director de la Casa de Cultura de Mieres ye tamién la segunda vez que recibe’l Xosefa Xovellanos que yá algamare n’otra ocasión cola novela “El cuartu negociu”. Na estaya de poesía, Xabiero Cayarga tien tamién el so nome puestu en dellos de los más importantes premios de poesía asturianos,ente ellos el Teodoro Cuesta, qu’algamare nel añu 2003 col poemariu “Pequeña Europa”, amás d’otros reconocimientos como’l premiu de narraciones de l’Academia de la Llingua que consiguiere por “El boleru de Xabel” nel añu 1994.

En cuantes al premiu de periodismu, la estaya de periodismu escritu foi pa Cristóbal Ruitiña, xefe de prensa del Conceyu de Cangas del Narcea y collaborador davezu del selmanariu Les Noticies, mediu onde espublizó’l reportaxe ganador “Una historia de la mina poco conocida”.

Amás de felicitar a tolos ganadores, dende Asturies.com congraciámonos especialmente pol premiu na estaya de periodismu audiovisual a Inaciu Galán (Xixón, 1986) collaborador d’esti mediu dende l’añu 2004 col so espaciu “Asina foi… el Surdimientu” un programa de la emisora lluanquina Onda Peñes en collaboración con Asturies.com nel que s’entrevista a los protagonistes del movimientu cultural asturianista dende los años 70 pa contra acá y nel que s’espublizó con motivu del fallecimientu del escritor Mánfer de la Llera n’abril d’esti añu 2005 esti especial.

Espublizáu por

Máster en Sociedá de la Información y el Conocimientu na UOC, Grau en Periodismu pola UDIMA, Especialista n'asturianu nel Máster de Profesoráu, Diplomáu en Turismu y Especialista en Xestión Cultural pola Universidá d’Uviéu. Anguaño preparo la mio tesis doctoral. Tengo trabayao en medios como la Cadena Ser, Onda Peñes, Asturnews... Dende 2007 presento programes na TPA, como Xente de casa y el recién Territoriu Sidreru. Los llunes en Noche tras noche, falo na RPA. En 2012 escoyéronme pa presidir Iniciativa pol Asturianu, lo que compaxino cola direición de la revista Formientu, el trabayu como profesor en dellos cursos, xestor cultural, amás d'otres xeres profesionales, culturales y reivindicatives. Dende 2016 exerzo como profesor de llingua asturiana y lliteratura n'institutos.

2 atopaos en “Noticia: La Conseyería de Cultura entregó ayeri los premios añales a la creación lliteraria y periodística en llingua asturiana.

  1. Inaciu, has d’echar una güeyada a esta páxina.
    Mira bien el númberu d’actualizaciones que ficiste güei y l’impactu que tuvo esi fechu al emburriar tolos demás conteníos de la bloguesfera asturiana, pa recopilar noticies sobre to d’hai años.
    N’internet, eso tien un nome: SPAM, y ta visto como daqué de mui mala educación, repunante y cafiante.
    Nun ye nada personal, eh. Ye namás qu’etiqueta básico d’internet. Paezme mui bien que vayas metiendo toa esta info equí, pero has de facelo con postura, pocoñín a pocoñín hom.

  2. Bones Xana, disculpa, ye que güei tuvi tiempu pa meter noticies que tenía guardaes dende cuantayá y que me prestaba tener axuntaes na rede. Y eso, disculpái los que vos pudiera causar molesties, nun pretendía saturar la rede 😉
    La verdá que nin me di cuenta del llistáu d’Asturies.com, que si que lu monopolicé, pero bono, creo que más o menos metí cuasti tolo que tengo, nun se repitirá, agora lo que vaiga saliendo.
    Un saludu, disculpa otra vegada y gracies Xana.

Dexar un comentariu

La to cuenta de corréu nun va espublizase.