En segundu llugar empataron l’ésitu de les esperiencies de doblaxe de películes al asturianu en TPA y el votu favoratible de la Xunta Xeneral y el Conseyu Escolar del Estáu pa que’l profesoráu d’asturianu vea reconocida la so especialidá pol Ministeriu d’Educación
XIXÓN. 13/01/2015 || El periodista y presidente d’Iniciativa pol Asturianu, Inaciu Galán, ponía en marcha a entamos d’añu una votación popular al traviés d’internet col oxetivu de conocer les meyores noticies pa la llingua asturiana del añu 2014. Una votación qu’organiza per segundu añu consecutivu. Esti añu la encuesta recibió más de 300 respuestes de ciudadanos que quixeron contestala y escoyer ente les 23 noticies que propunxo Inaciu Galán. Los resultaos diéronse a conocer güei martes nel programa ‘La radio es mía’, presentáu por Pachi Poncela y Sonia Avellaneda na RPA, onde Galán tien una sección selmanal los martes a les 9:20 de la mañana.
Dempués de dos selmanes de votaciones, y con un 27% de los votos, los internautes escoyeron como meyor noticia pal asturianu de 2014 la emisión de la serie ‘Los Bolechas’ doblada al asturianu, una de les primeres esperiencies nesti ámbitu na TPA. La reivindicación per parte de la sociedá civil, el sector educativu y munches families de cuntar con programes n’asturianu pa los neños na canal pública asturiana entama a vese cumplida anque con una duración bien curtia, de namás unos 10 minutos a la selmana.
En segundu llugar, col votu d’un 23,8% de los participantes, empataron dos noticies. L’ésitu de les primeres esperiencies de doblaxe de películes al asturianu en TPA, que cuntaron con bona aceptación popular y audencia, y les votaciones de la Xunta Xeneral y el Conseyu Escolar del Estáu que tuvieron por resultáu la posición a favor del reconocimientu de la
especialidá d’asturianu pal profesoráu, nel casu del parllamentu asturianu, col votu de tolos grupos políticos de la cámara, menos el PP, que chocantemente llevaba esta promesa nel so programa electoral de 2012.
Los comentarios de los votantes per internet coincidieron na necesidá de que la emisión de películes doblaes y la programación infantil tenga continuidá, y que seya normal ver na televisión pública asturiana, películes y programes infantiles, ente otros conteníos, na nuesa llingua.
En tercer llugar, col 20,6% de los votos, tuvo la noticia xenerada pola apaición del primer sistema operativu que permite tener un móvil dafechu n’asturianu. Un proyectu de Softastur que se presentó esti añu y que dio accesu a la llingua asturiana, gracies al software llibre, a un espaciu hasta agora torgáu.
La cuarta noticia escoyida, col 17,5% de los votos, foi la puesta en marcha d’un informativu diariu na radio autonómica (RPA), que se fai cada día a les 13 hores baxo la direición de Naciu Varillas. La quinta noticia, col 16,7% de sofitos, ye la noticia que xeneró la cadena de distirbución vasca Eroski, usando l’asturianu na rotulación del so centru en Mieres y nes redes sociales, onde contesta n’asturianu a les persones que-yos escriben nesta llingua.
En sestu llugar los internautes escoyeron, col 15,1% los votantes decidieron que la votación en contra de la Xunta Xeneral pa refugar l’intentu del PP de facer competir al asturianu con otres llingües en primaria, amás de con Cultura Asturiana. Otres votaciones, nes que se consiguieron unos importantes consensos, siempres ensin el PP, que cola so mayoría absoluta bloqueó l’aprobación, foi la votación llevada alantre nel Congresu los Diputaos pa dotar a l’Academia de la Llingua Asturiana d’una partida nos Presupuestos Xenerales del Estáu, como tienen toles academies de llingües del Estáu español, asina como la solicitú presentada por Llamazares pa que’l Gobiernu solicitare a la RAE’l cambéu de denomación del asturianu nel so diccionariu. Estes midíes fueron propuestes por Iniciativa pol Asturianu. La noticia quedó en séptimu llugar col 11,9% de los votos.
Con unos porcentaxes cercanos tuvieron la publicación del llibru ‘El Hobbit’ n’asturianu, la puesta en marcha de la tv dixital n’asturianu ‘Alderiques d’Asturies’, que’l RIDEA usara l’asturianu como llingua vehicular d’un congresu, la continuidá de la colección d’Asterix n’asturianu (la salida del primer exemplar yera pa los internautes la meyor noticia del añu en 2013), la salida de Telegram n’asturianu o la llegada al Altu Comisionáu de Drechos Humanos de les Naciones Xuníes de la situación del asturianu, ente otres.
