Esti miércoles 6 de mayu, dientro de los actos de la Selmana de les Lletres Asturianes, participo na llectura pública y siguida de la torna al asturianu d’El Quixote que va facese de 12 a 14 hores nel Paraninfu de la Universidá d’Uviéu.
Una manera más de reivindicar les posibilidaes espresives de la llingua asturiana como llingua culta y lliteraria tamién. Al mesmu tiempu paezme una forma bien guapa de facer homenaxe a Pablo Suárez García, qu’esbrexó pa llevar alantre la traducción d’esti llibru cuatro sieglos dempués de la so espublización.
Voi lleer alredor de la una la tarde, nel puestu 44 d’ente les persones que van participar nesta llectura y el mio testu entama asina:
Cunta la hestoria que don Quixote daba voces a Sancho que-y traxera’l yelmu, taba él feriando unos cuayaos que los pastores-y vendíen; y acosáu pola muncha priesa del so amu, nun supo qué faer d’ellos, nin en qué los traer…
Ayeri entregáronse n’Estorga (Lleón) los premios del Certame Lliterariu La Caleya. El mio poemariu ‘Alcordanza’, resultó ganador del tercer premiu.
Gracies al xuráu (Nicolás Bartolomé Pérez, Alfredo Hernández Rodríguez y José R. Morala), a l’asociación La Caleya y al Conceyu d’Estorga y norabona al restu los premiaos, ente los que tán Marisa López Diz y Luis, Ricardo Chao Prieto, Adelaide Monteiro…
Ye un premiu que presta abondo porque la convocatoria ye pa los escritores de tol dominiu llingüísticu asturlleonés, dende Miranda del Douru a Asturies, y ayuda al importante llabor d’afalar la idea de xunidá de la nuesa llingua a lo llargo de tolos territorios onde ye propia. Que seya per munchos años.
Acaben de xubir los conteníos del númberu nuevu de la revista d’investigación de l’Academia de la Llingua Asturiana, ‘Lletres Asturianes’, con artículos bien interesantes (pue consultase completa en www.lletresasturianes.com )
Pero bono, que yo vengo a falar del mio llibru 😉 A ver qué vos paez l’artículu y si tenéis más aportaciones, porque esti tema de la publicidá n’asturianu tien más hestoria de lo que podemos pensar y queda muncho por investigar. Equí la mio aportación.
Delles aportaciones pa una hestoria de la publicidá n’asturianu / Some contributions to a history of advertising in Asturian language
RESUME: Esti trabayu fai por encadarmar dalgunes pautes sobre’l comportamientu de la llingua asturiana nel ámbitu de la publicidá, trabayando sobre un corpus d’anuncios previos al Surdimientu atropáu pol autor en prensa dende’l sieglu XIX. L’artículu aporta una amuesa de decenes d’elementos publicitarios en llingua asturiana y ufre unes primeres notes pa un campu cásique non esploráu nel ámbitu del asturianu.
Manuel L. Rodríguez ye un escritor gallegu que ta deprendiendo asturianu a distancia nos cursos d’Iniciativa pol Asturianu. Dempués de lleer el so prestosu poemariu ‘Antítese nativa’, en gallegu, y tres el so esfuerciu por deprender la mio llingua, paecióme que lo menos que podía facer ye regala-y esta versión n’asturianu d’unu de los sos poemes.
El llibru asoleyólu la editorial ‘Acha Escrava’ en 2010.
y asina esquivó una lluz la ciudá cafiante
porque les hores pasaben y naide les paraba
o quiciabes poles feríes en peñes abiertes
nel mofu d’animales esclavos y anónimos
estraos en figures solombriegues al llau de les cañes
de bidul, d’umeru… (les sebes)
cunten
que cuatro homes aportaron nun barcu;
trés con paños escuros tapando la tiesta
otru llabrando darréu un monte mayáu.
Quemen
y el partu manca esta parte de costa
fundida AMBUREN felizmente les arteries del caxellu
Iniciativa pol Asturianu celebró dos actos el pasáu 28 de febreru n’Uviéu col envís de promocionar la lliteratura asturiana y facer homenaxe a la figura del escritor, clásicu de les Lletres Asturianes, Xuan María Acebal, del qu’esti 8 de marzu van cumplise 200 años del nacimientu.
A les 11 hores nel Cementeriu d’El Salvador d’Uviéu celebróse esti Homenaxe a Acebal, nel que se lleeron poemes del autor y hebo unes pallabres alredor de la so figura per parte d’Inaciu Galán, presidente d’Iniciativa pol Asturianu, y Javier Cubero, investigador de la obra d’Acebal. L’actu celebróse xunto al llugar onde descansen los restos, d’Acebal no que quixo ser un homenaxe a la lliteratura asturiana, énte l’escaezu de les autoridaes culturales d’Asturies, y cuntó cola participación de representación de los descendientes del autor de ‘Cantar y más cantar’.
Iniciativa pol Asturianu presentó los datos del informe lleváu al Altu Comisionáu de los Drechos Humanos de les Naciones Xuníes nuna rueda de prensa na Academia de la Llingua Asturiana (ALLA). L’actu abrióse coles pallabres de Xosé Antón González Riaño, vicepresidente de l’ALLA, qu’esplicó dalgunes de les esperiencies previes nes que la situación de la llingua asturiana tuvo yá n’otros ámbitos internacionales, como na UNESCO o nel Conseyu d’Europa.
Inaciu Galán, presidente d’Iniciativa pol Asturianu dio en primer llugar queremos les gracies a l’Academia de la Llingua Asturiana «por acoyenos güei equí nel so llar y da-y con ello una mayor difusión a les informaciones», recordando darréu la importancia de la presencia internacional del idoioma pa Iniciativa pol Asturianu «dende’l ñacimientu d’Iniciativa pol Asturianu en 2011, punximos en marcha una vocalía de Rellaciones Internacionales, al cargu de la que ta Xosé B. Álvarez, que por vivir nel estranxeru nun pue tar güei equí».
Galán esplicó como al traviés d’esta estaya de la organización «entamamos tolos caminos que fuimos quien pa que la presencia de la llingua asturiana en foros internacionales fuera lo más amplia posible». «Nesi camín -esplicaba- en 2012 convertímonos n’entidá miembru de la European Language Equality Network, la Rede Europea d’Igualdá Llingüística, onde decenes d’entidaes europees que trabayen na defensa de les sos lling ües minorizaes convivimos y trabayamos a comuña pa consiguir avances pa toes elles».
«Gracies a formar parte d’esta entidá cola que venimos trabayando n’ámbitos internacionales, l’asturianu tuvo n’ámbitos onde se trata la cuestión llingüística del Estáu español onde davezu fálase namás de les llingües oficiales y non de les que, como la de nueso, tienen una situación entá peor», remató’l presidente d’Iniciativa pol Asturianu. Darréu dio llectura a esti comunicáu y respondió a les entrugues que la prensa presente-y fizo.
LA REVISIÓN PERIÓDICA UNIVERSAL DEL CUMPLIMIENTU DE LOS DRECHOS HUMANOS NEL ESTÁU ESPAÑOL
El pasáu miércoles 21 de xineru en Xinebra (Suiza) llevóse a cabu’l procesu de Revisión Periódica Universal del cumplimientu de los Drechos Humanos nel Estáu español per parte de les Naciones Xuníes (ONX).
Esti procesu tien como oxetivu la revision per parte de trés estaos miembros de la ONX del cumplimientu nun país de la Declaración Universal de los Drechos Humanos (DUDH) y de los alcuerdos y convenios internacionales arreyaos a la mesma. Nesti casu, los estaos del Reinu Xuníu, Sierra Lleona y Macedonia foren los encargaos de revisar la situación del Estáu español.
Col enfotu de dar una visión más realista de lo que lleva asocediendo nesti Estáu les caberes décades, la Rede Europea d’Igualdá Llingüística (ELEN) apurrió un informe onde recoyía dolcenes de casos de violación y discriminación hacia falantes de les llingües diferentes del castellán, ello ye: aragonés, asturianu, catalán, gallegu y vascu.
En dellos casos como’l catalán, los incumplimientos y violaciones de la DUDH yeren mayoritariamente cometíos pola alministración española. Nel casu de la llingua asturiana, l’asociación Iniciativa pol Asturianu (miembru d’ELEN) recopiló más de 25 casos de discriminación nos caberos años, mayoritariamente cometíos per parte de l’alministración pública asturiana y alministraciones llocales. Estos casos diben dende la decision d’un xuez de nun considerer discriminatorio multar a estudiantes d’una escuela en Villaviciosa con 25 pesetes por cada pallabra que dicíen n’asturianu, a la negación de les alministraciones llocales a almitir instancies nesta llingua, la negación a un ciudadanu asturianu de declarer na so llingua na Audiencia Nacional, o la falta de regularización de la escolarización en llingua asturiana (particularmente nes etapes pre-escolares y de Primaria)
Amás d’ello, tamién recoyía la falta ñidia de les sos obligaciones per parte del Estáu español a la hora de facer cumplir a la Comunidá Autónoma del Principáu d’Asturies y a los Gobiernos llocales la llegalidá vixente (Estatutu d’Autonomía y Llei d’Usu del Bable/Asturianu), qu’obliguen a un tratu igualitariu hacia los falantes d’asturianu al respective del tratu que reciben los que s’espresen en castellán.
A lo cabero, l’informe concluyía que tolos casos recopilaos a lo llargo’l territoriu español amosaben una discriminación sistemática ya institucionalizada, y que la busca de xusticia al traviés de los (hostiles) xulgaos ta yá escosada, lo qu’afita los pegoyos p’apelar a la Corte Europea de Drechos Humanos y al Tribunal de Xusticia Européu y posiblemente L’Haya.
Una delegación d’ELEN tuvo presente nel procesu, onde l’Estáu español espunxo una vision positivista y autocomplaciente de la so realidá interna, a la que los representantes de los trés estaos miembros arrespondieron de forma tolerante ya igualmente complaciente.
Magar too esto, los estaos evaluadores sí formularon entrugues y espunxeron la realidá del Estáu no tocante a abusos de drechos fundamentals, como son l’abusu de la fuercia per parte de les autoridaes, les fatídiques polítiques d’aisllamientu de deteníos y la brutalidá de les midíes emplegaes pa refugar la entrada de migrantes desarmaos ya indefensos nes valles de Ceuta y Melilla
Desafortunadamente, Iniciativa pol Asturianu y ELEN camenten que ye inalmisible que nengunu de los estaos revisores se dignare a formular una sola entruga no tocante a los drechos llingüísticos, lo que dexa a les clares la falta de compromisu real per parte de les Naciones Xuníes hacia un drechu fundamental qu’amás ta recoyíu na Declaración Universal de los Drechos Llingüísticos, ellaborada por esta mesma institución y amestada a la Declaración Universal de los Drechos Humanos.
Pa rematar, Iniciativa pol Asturianu quier declarar el so fonderu compromisu hacia la defensa de los drechos fundamentales de los falantes non solo d’asturianu, sinón de toles llingües minorizaes. La próxima cita internacional, na qu’Iniciativa pol Asturianu y ELEN tarán presentes, sedrá nel mes de xunu, en Xinebra, onde la Oficina del Altu Comisionáu pa los Drechos Humanos va evaluar el cumplimientu per parte del Estáu español de la Carta Europea de les Llingües Rexonales o Minoritaries (ECRML), testu que robló y ratificó y qu’inda anguaño ta bien lloñe de cumplir.
Sedrá ellí onde denunciemos los continuaos incumplimientos del Gobiernu d’Asturies y d’España pa col respetu de los drechos civiles de los usuarios d’asturianu, asina como la falta de midíes que favorezan la supervivencia del idioma, talo como se comprometió l’Estáu español na Constitución de 1978 y cola firma en 2001 de Carta Europea de les Llingües Rexonales o Minoritaries.
Volvemos a recordar que la ferramienta necesaria pa entamar a solucionar estos problemes y dar la necesaria seguridá xurídica a los asturianos que tienen por llingua d’usu habitual l’asturianu, ye la reconocencia del asturianu como llingua co-oficial n’Asturies, xunto al castellán, n’igualdá de condiciones. Ye la Xunta Xeneral y les formaciones que tán n’ella, quien tienen la responsabilidá de tomar la inciativa pa que la oficialidá del asturianu seya una realidá, talo y como recomienden les organizaciones ya instituciones internacionales que dende va años vienen analizando la situación sociollingüística y llegal d’Asturies.
Nesta edición d’Iniciativa pol Asturianu nes ondes ufrimos les opiniones y l’actu completu de pieslle de la quinta edición del Cursu d’Asturianu que la organización Iniciativa pol Asturianu ta llevando alantre dende cuantayá y qu’estos díes ponía en marcha la so sesta edición.
Ente los entrevistaos, Xosé Antón González Riaño, vicepresidente de l’Academia de la Llingua Asturiana y dellos alumnos de los cursos.
En segundu llugar empataron l’ésitu de les esperiencies de doblaxe de películes al asturianu en TPA y el votu favoratible de la Xunta Xeneral y el Conseyu Escolar del Estáu pa que’l profesoráu d’asturianu vea reconocida la so especialidá pol Ministeriu d’Educación
XIXÓN. 13/01/2015 || El periodista y presidente d’Iniciativa pol Asturianu, Inaciu Galán, ponía en marcha a entamos d’añu una votación popular al traviés d’internet col oxetivu de conocer les meyores noticies pa la llingua asturiana del añu 2014. Una votación qu’organiza per segundu añu consecutivu. Esti añu la encuesta recibió más de 300 respuestes de ciudadanos que quixeron contestala y escoyer ente les 23 noticies que propunxo Inaciu Galán. Los resultaos diéronse a conocer güei martes nel programa ‘La radio es mía’, presentáu por Pachi Poncela y Sonia Avellaneda na RPA, onde Galán tien una sección selmanal los martes a les 9:20 de la mañana.
