LES NOTICIES. REDACCIÓN. UVIÉU – 08/05/2012 A LES 10:34:02 Yá tá la venta’l primer llibru d’Inaciu Galán pensáu pal públicu infantil: Nel, el coríu que nun sabía nalar. Ye la primer creación d’esti autor pa la reciella. Na historia vamos conocer al coríu Nel, un personaxe mui especial que va tener que superar dalgunos mieos pa poder vivir con normalidá nel fontán, colos demás compañeros.
El llibru tien 24 páxines, ente les qu’hai dos d’exercicios. Ta ilustráu a tou color con dibuxos d’Enrique Carballeira. Ye una novedá más de la editorial Asturtoons, una empresa especializada en cómic, audiovisuales y animación.
Darréu reproduzo l’artículu asoleyáu na versión en papel de La Nueva España nel que dende Iniciativa pol Asturianu contestatmos a una carta asoleyada nel mesmu periódicu, aclarando cuestiones alredor de la situación del asturianu nel enseñu.
Una carta asoleyada estos díes en LA NUEVA ESPAÑA y titulada «El asturiano contra los asturianos» incluyía delles afirmaciones falses, y creemos que feches col únicu oxetivu de perxudicar la imaxe del nuesu idioma ente los asturianos. Nun podemos quedar ensin contestar a estes falsedaes. Amás, sírvenos d’escusa pa emitir una opinión sobre la situación del enseñu del asturianu nes escueles y nos institutos.
Na carta afirmábase qu’a los alumnos que nun estudien asturianu se-yos obliga a “nun facer nada”, cuando en realidá tienen hores d’estudiu. De toes formes, coincidimos en qu’esta situación ye absurda, tolos alumnos tendríen d’asistir a les clases d’asturianu, como toos asisten a matematiques o ciencies, independientemente de les sos creencies o gustos.
Esti llunes 16 d’abril de 2012, a les ocho la tarde, la revista Formientu, revista lliteraria qu’axunta la obra d’autores mozos n’asturianu, va presentar el so númberu 10, dempués de 5 años de camín andáu. L’actu va celebrase na sede de la Sociedad Cultural Gijonesa, asitiada nel númberu 4 de la Cai Balmonte de Miranda, en Xixón. Nel actu van intervenir, el director de la revista, Inaciu Galán, miembros del conseyu de redacción de la revista, y los autores qu’apaecen nesti númberu, dando llectura a los sos testos.
El primer númberu de Formientu presentóse nel añu 2006 tamién en Xixón, dende entós vienen participando na revista más de 60 autores, menores de 30 años y qu’usen l’asturianu nos sos testos. La revista ta abierta a autores mozos de tol dominiu llingüísticu asturlleonés, y yá espublizaron testos autores de Lleón o Zamora, amás de dalgunos descendientes d’asturianos n’otros estaos d’Europa y América.
Nesti númberu apaecen poemes de Cristina Menéndez Martín (Mieres, 1984), Frantxu Melero (Avilés, 1987), Inaciu Galán y González (Xixón, 1986), Abel Aparicio González (Lleón, 1980), Alejandra Sirvent (Pravia, 1980), Fonsu Suárez Román (Xixón, 1991), Javier Cubero de Vicente (Xixón, 1986), Vítor Suárez Piñero (Uviéu, 1986) y rellatos de Suárez Piñero y Blanca Fernández Quintana (Bimenes, 1994), amás d’una crítica lliteraria de Denis Soria Fernández (Xixón, 1989).
Esti númberu de la revista, que sal agora al mercáu, ta a la venta na páxina web de l’asociación Xareos!, que la edita, www.xareos.com
Formientu aprovecha pa convidar a los autores mozos a unviar los sos testos al conseyu de redacción de la revista, col envís d’espublizalos. Pueden facelo nel corréu lletrónicu formientu@xareos.com
Entrevista emitida nel programa Pieces, de la TPA, sobre’l llibru de monólogos «Pa echar unes rises», una antoloxía qu’acabo d’asoleyar con Ediciones Trabe.
La editorial Trabe acaba de poner nes llibreríes un llibru que preparé pa ellos: “Más monólogos…¡Pa echar unes rises! II Antoloxía de monólogu modernu”. El volume vien a ser la segunda parte de l’antoloxía del mesmu tipu asoleyada en 2008, y como naquel casu faigo la escoyeta de los monólogos y l’entamu.
Permitíme participar con un testu col que gané’l Premiu Pepe Campo de monólogu en 2010 «La mio fía cásase», amás del entamu del llibru. Anímovos a pasar un ratín echando unes rises con él.
Esti sábadu 31 a les 12:15 la TPA va emitir una entrevista dientro del programa Pieces na que-y cuento a Vanesa Gutiérrez dalgunos detalles del llibru y falamos del estáu del monólogu asturianu anguaño. Podéis ver la TPA en direuto nesti enllaz.
Artículu espublizáu en Les Noticies por mor del pieslle de la so edición en papel.
INACIU GALÁN Y GONZÁLEZ. XIXÓN – 02/02/2012 A LES 13:16:54 Nunca nun tuvi soscritu a LES NOTICIES por una razón: cada vienres prestábame esi vezu d’averame al quioscu y mercar el periódicu. Demientres munchu tiempu y hasta’l so pieslle mercábalu na Llibrería Alborá de Xixón, dempués de convencer a Chusa, la so llibrera cabera, de que yera bona idea distribuyilu ellí. Aquel vezu de garrar el periódicu n’asturianu cada vienres daba un poco de normalidá nun país onde vivir na llingua propia ye anguaño mui difícil.
Prestábame tanto ver al mio idioma nel papel impresu d’un periódicu que dende los mios entamos nel mundu de la reivindicación llingüística fui guardando cada selmana tolos exemplares de LES NOTICIES, pese a les amenaces de mios padres en casa y a sabiendes de sufrir un ciertu grau de síndrome de Dióxenes.
Va un par de selmanes un collaciu redactor d’esti periódicu tuvo nuna celebración na mio casa y con un xestu cómpliz convidélu a ver lo que tenía guardao nuna caxonera d’un solláu de mio casa. Cientos d’exemplares de LES NOTICIES que guardé cada vienres como una ayalga. Sabía qu’él yera de les poques persones que podría valorar aquella colección que ficiere colo años, y asina foi.
Agora esos periódicos, dalgunos un poco mariellos yá, tienen más que nunca’l valor de recordanos que facer un proyectu periodísticu n’asturianu ye posible y que la nuesa llingua un día tuvo un periódicu, dempués de más de cien años ensin tenelu, tres la esperiencia d’Ixuxú en 1901. Hai qu’aguardar qu’agora nun tengamos qu’esperar otru cientu d’años pa ver al asturianu nes rotatives. Y tenemos qu’aprovechar esta mala noticia pa convertila en ganes de lluchar pol idioma, y en reflexón, porque yá son munchos los proyectos empresariales venceyaos a la nuesa llingua qu’echen el pieslle y nello dalgo tendremos que ver nós, habrá que reflexonar y actuar.
El vienres pasáu, al dir a mercar el penúltimu LES NOTICIES, entré nun quioscu y pidílu. El quiosqueru contestóme n’asturianu y, mientres, na radio, taben dando un informativu tamién nel nuesu idioma. Per un momentu sentí que vivía nun país onde la mio llingua yera normal, onde podía vivise n’asturianu. Una sensación que siento que nun voi sentir otra vegada, porque agora los vienres, ensin LES NOTICIES nos quioscos, van tar un poco güérfanos. Gracies por da-y un pocoñín de normalidá al asturianu nestos años.
Xareos! Xestión Cultural organizó un actu de presentación de la so revista Formientu por mor del so quintu aniversariu y despidió l’añu y, a dellos de los sos autores más vieyos, nun actu que se celebró nel chigre L’Ayalga, de Xixón, el xueves 29 d’avientu de 2011.
Esti actu sirvió tamién pa recaldar fondos pa l’asociación Iniciativa pol Asturianu, pues tolos ingresos taben destinaos al llabor de la organización, que collaboró tamién cola organización del actu.
Nesti númberu apaecen poemes de Pablo Rodríguez Medina, Xurde Fernández, Ricardo Candás y Héctor Pérez Iglesias. Testos narrativos d’Abel Martínez, Jorge Fernández García, Pablo A. Quiroga Prendes, Rubén Rey Menéndez ya Inacio Rodríguez-Solar. Amás de dos crítiques de llibros, feches por Iván Cuevas y José Ángel Gayol sobre «Les últimes pallabres» y «Pequeñu álbum de familia».
Dende hai unos meses, un grupu de persones ta trabayando na creación d’un coleutivu nuevu de defensa de la llingua asturiana. Ésti, que lleva’l nome d’Iniciativa pol Asturianu, va presentase’l sábadu n’Uviéu.
L’actu, abiertu a toles persones interesaes nesti proyeutu, va desarrollase a les 19 hores nel salón d’actos de la Biblioteca d’Asturies (El Fontán). Nél van presentase les llinies xenerales de trabayu de la organización, que celebró’l so conceyu fundacional el 29 d’ochobre pasáu nel Auditoriu d’Uviéu, asina como’l so organigrama. L’eventu previstu esti sábadu tamién va tener güecu pal humor y la música. Tres el mesmu, magar les 21 hores, va celebrase una folixa nel chigre L’Esperteyu.
Iniciativa pol Asturianu ye una asociación “de ciudadanos pa ciudadanos” col oxetivu de trabayar pola normalización de la llingua asturiana y pol reconocimientu de los derechos llingüísticos de tolos asturianos. Por esti motivu, establez nos sos estatutos que nenguna persona de la xunta direutiva pueda exercer nengún cargu en partíu políticu y sindicatu. La intención del coleutivu ye tener implantación en tolos conceyos del país, dar visibilidá al conflictu llingüísticu y afalar la oficialidá.
Artículu espublizáu en Les Noticies onde se fala de la conferencia que dimos Próspero Morán y yo nes XXX Xornaes d’Estudiu, onde propunximos un Pactu pola Recuperación y el Fomentu de la Toponimia Tradicional Asturiana a los medios de comunicación. Podéis velu equí, en pdf: artículu toponimia en Les Noticies.
LES NOTICIES. REDACCIÓN. UVIÉU – 08/05/2012 A LES 10:34:02 Yá tá la venta’l primer llibru d’Inaciu Galán pensáu pal públicu infantil: Nel, el coríu que nun sabía nalar. Ye la primer creación d’esti autor pa la reciella. Na historia vamos conocer al coríu Nel, un personaxe mui especial que va tener que superar dalgunos mieos pa poder vivir con normalidá nel fontán, colos demás compañeros.
LES NOTICIES. REDACCIÓN. UVIÉU – 08/05/2012 A LES 10:34:02 
