Participación na Xunta d’Escritores 2008 d’Uviéu, en xineru de 2008.

——————————————————–

LLITERATURA ASTURIANA Y COMPROMISU A DEBATE N’UVIÉU 02:28 hores :: 03/Xineru/2008 :: espublizao por XAVIEL VILAREYO :: [cultura, lengua, ciencia]

Lliteratura asturiana y compromisu
a debate n’Uviéu

La primer xornada de la Xunta d’Escritores Asturianos debatió nunes interesantísimes sesiones sobre la lliteratura asturiana y el compromisu de los escritores en llingua asturiana na que tuvieron presentes ente otres persones los escritores Carlos Rubiera, Pablo Rodriguez Medina, Ánxel Alvarez Llano, Helena Trexu, Humberto Gonzali, Henrique Carballeira, Bertu Ordiales, Ánxel Nava, Inaciu Llope, Xuan Santori, Esther Prieto, Esther García, Xaviel Vilareyo, Bertu Alvarez Peña, Carlos X. Blanco, Xandru Fernández y Xabel de Cea. Amás la xornada inaugural de la Xunta cuntó cola presencia de la presidenta de l’Academia de la Llingua Asturiana, Ana Cano y del académicu Antón González Riaño.

El xueves 3 de xineru tán programaes les conferencies de Xosé Lluis Campal y Xurde Morán, amás de presentaciones de llibros de Xuan Carlos Crespos y d’Esther García López. También habrá un recital poéticu cola presencia de diez autores la tercer xeneración del Surdimientu. El vienres 4 de xineru, tamién a les 5 la tarde entamarán les comunicaciones de Marta Lozano, Inaciu Galán, Humberto Gonzali, Mayte González, y la escritora aragonesa Trinidad Ruiz, que falarán sobre la historia de la bandera asturiana, los monólogos, los aconceyamientos d’escritores asturianos y sobre la edición n’Hespaña. La Xunta d’Escritores Asturianos pesllará esta edición cola presencia del poeta aragonés Ángel Guinda que vendrá a Uviéu especialmente pa presentar una conferencia sobre’l so mundu poéticu que precederá a la presentación n’Asturies d´ún de los sos últimos llibros tituláu “Tola lluz del mundu” que recueye los sos poemes nes seis llingues del Estáu hespañol, editáu pola editorial aragonesa Olifante.

L’escritor aragonés Ángel Guinda va ser el convidáu d’honor d’esta edición de la Xunta d’Escritores Asturianos que tendrá llugar n’Uviéu na Biblioteca del Campu San Francisco los díes 2 ,3 y 4 de xineru del 2008. Ángel Guinda nació en Zaragoza el 26 d’agostu de 1948. Dende 1987 reside en Madrid. Reivindica “una poesía comprometida que seya non sólo obxetu de guapura sinón tamién suxetu de conducta, una poesía que-y sirva al ser humanu: moralmente pa vivir; estéticamente pa gozar; y culturalmente pa enanchar y afitar el so saber”. La so obra ta marcada por un realismu esistencial. La so vida y poética podemos sacales d’una selección de los sos aforismos referíos al poeta y a la poesía: “La poesía sirve al individu y a la comunidá como mediu propagandísticu de guapura, verdá y llibertá”, “Ser poeta nun ye una profesión. Ser poeta ye una posesión”, “Escribir como se vive”, “Escribir como se ye”, “Espresase ye vivir”, “La poesía sirve, la poesía ye”, “La poesía ye palabra ensin apenas palabres”, “Poesía: conciencia con ciencia”, “El poeta ta siempre en contra, alcontrándose frente a y cola contradicción”, “Menos divos, más poetes suversivos”. En 1977 fundó la colección Puyal de llibros de poesía, y en 1988 la revista Malvís. Nos suplementos lliterarios de los periódicos Heraldo de Aragón, El Día, El Periódico de Aragón y en delles revistes (Turia, Cuadernos del Matemático, Poesía Por Ejemplo, Los Cuadernos del Norte …) publicó crítica en cientos d’artículos sobre los autores clásicos y contemporáneos. La obra d’Ángel Guinda ta marcada poles principales consideraciones de la so propia poética: “La palabra ye un ser vivu”, y “Escribo contra la realidá, non sobre ella”. Tamos ante una poesía útil, espresionista, torturada, grave y fonda. Una poesía fía de la rebeldía y del más llúcidu pesimismu; vitalista pesie a ser un testimoniu de la convivencia del ser humanu cola muerte. Nel añu 2006 llevó alantre una fuelga de fame pa reivindiar la reconocencia d’unos compromisos culturales irrenunciables. Malditu pa unos, exemplar pa otros. La so gueyada filosófica, el so llinguaxe depuráu, l’estrictu dramatismu, lleváronlu a esa llende na que limita la poesía col puru silenciu y a consideralu por un sector de la crítica como “unu de los poetes más necesarios y reveladores que dio la lliteratura ibérica d’estes caberes décades. Defensor de toles llingües ibériques en perfecta harmonía publicó hai poco el pimer poemariu sextillingüe del Estáu hespañol, (Tola lluz del mundu) incluyendo nél a les llingües asturiana y aragonesa.

——————————————————————————–

XUEVES 3 DE XINERU:

– 17,30 – Presentación n’Uviéu del llibru Lías, apendiz de contador d´hestories, de Xuan Carlos Crespos.

– 18h – Preocupaciones humanistes na poesía de Carlos García Velasco (1973-1975), Xosé Lluis Campal.

– 18,30h – Diez años caleyando Asturies. Xurde Morán.

– 19h – Llingua y hestoria del Fueru de Zamora. Xaviel Vilareyo.

– 19,30 – Presentación de los llibros d´Esther García López Historias de vida ya señas de muerte (Madú Ediciones) y Faraguyas cola intervención de Cristian Velasco.

– 20h – Recital poéticu: Xurde Fernández, Llucía Fernández Marqués, Chechu García, Elvira Laruelo, Marisa López Diz, Pablo Rodriguez Alonso, Pablo Rodríguez Medina, Xuan Santori, Susana Sela, Xaviel Vilareyo.

——————————————————————————–

VIENRES 4 DE XINERU:

– 17h – Historia y signu de la bandera d’Asturies. Marta Lozano.

– 17,30 – Monólogu modernu: el compromisu d´un xéneru. Inaciu Galán.

– 18 – Apuntes sobre los aconceyamientos d´escritores asturianos. Mayte González.

– 18,30 – Una institución pa les lletres asturianes. Humberto Gonzali.

– 19h – Olifante: una oferta de felicidad. Trinidad Ruiz Marcellán, directora de la Editorial Olifante, del Festival del Moncayo y de la Casa del Poeta de Trasmoz.

– 19,30h – Arquitextura. Ángel Guinda.

– 20h – Presentación del llibru Tola lluz del mundu, d´Ángel Guinda (Editorial Olifante), primer poemariu sextillingüe del estáu hespañol, cola intervención de Trinidad Ruiz.

——————————————————————————–

LLUGAR: BIBLIOTECA DEL CAMPU SAN FRANCISCO – PASÉU DEL BOMBÉ – UVIÉU (entrada llibre)