Va dellos años un grupu de persones embarcámonos nel proyectu de l’Arribada, pa organizar un congresu lliterariu abiertu a la sociedá asturiana y a tolos sectores de la plural lliteratura asturiana. Nesto trés años punxi n’esta xera tol esfuerciu que pudi, convirtiéndose l’Arribada na mio principal ocupación cultural y algamando, dende’l mio puntu de vista, munchos de los oxetivos que mos marcáremos nun entamu.
Por ello y por tolo que me venceya sentimentalmente col proyectu y coles persones que formen parte d’él ye especialmente dura y triste la decisión que tomé estos díes dempués d’una fonda reflexón. Y ye qu’esta selmana presenté la mio dimisión como presidente y miembru de l’Asociación Cultural l’Arribada.
La razón de la mio dimisión nun ta encontada más que nunca causa, la decisión tomada pola mayoría de la organización de nun tomar nenguna midida disciplinaria, como pidí a los miembros de l’Asociación, énte la publicación del llibru “Desencantu” de Xosé María Vega “Chema Vega”, unu de los vocales de la directiva.
Esta decisión de nun condergar publicamente la publicación d’un miembru de la dirección de l’Asociación l’Arribada oblígame moralmente a dexar la organización poles causes que van darréu:
Nel llibru, espublizáu pola recién creada editorial “Nueva Celtia”, l’hestóricu asturianista, hasta onde yo conozo d’impecable curriculu cultural, profesional y políticu, espresa delles idees que nun puedo asumir y que me faen imposible la convivencia con él nuna organización: El racismu, la homofobia y la misoxinia qu’al mio paecer destilen munchos de los poemes d’esta obra páecenme motivos más que xustificaos pa que la organización repruebe estes declaraciones del autor. Al nun llegase a la fin a talu alcuerdu nun me queda otra, pa ser consuente coles mios idees democrátiques, qu’abandonar la mio participación na organización.
Y ye que nel llibru pueden lleese idees como les siguientes:
“Arios. Que guapo sería qu’una raza de guapos y de guapes, rubies de güeyos azules y cuerpos atléticos, nos sublimare. Que guapo sería qu’una raza de mentes pures, étiques, serenes y castes, nos llibraren de la fame, del odiu […] Y coles otres races un poco más escures, obtuses y malgoliente ¿qué facemos…?”
“¿Porqué nun diba dicilo? Préstame una Europa blanca, cuasi tresparente, racionalista y romántica al empar […] Diréisme qu’hai miseries inconfensables nel corazón d’esa Europa blanca. Pero yo quiérola asina ¿qué hai, qué hebo n’otros llugares prietos o mariellos?: ¿hutsis y hutus? ¿xudíos y moros?. ¡Qué grandes civilizaciones!. ¿Por qué nun diba dicilo? Préstame Europa, una Europa blanca.”
“Yo soi entá más racista que los negros de Harlem o que los moros”
“Nun me presta la piel prieto ¡qué voi facer!, a otros nun-yos presta lo morao o incluso lo verde. La canela peme bien nel arroz con llechi.”
“Yo soi blancu, raza blanca y sumiréme contigo cola murnia de la señaldá poles bones coses algamaes y un fondu desenfotu nes bondaes de la uniformidá del mestizaxe”
“Nun me presten los musulmanes, danme aquello, tan prietos, foscos, fanáticos, irracionales, la misoxinia mesma. Fálten-yos una o dos civilizaciones. Polo menos”
“Nun me presten les belleces morenes o prietes. Paécenme vulgares, amás hai abondo, cada vez más col puñeteru cuentu del mestizaxe”
“Mores: Nin putes nin sumises, pidís protección al Gobiernu francés de los vuestros propios machos. ¿Porqué nun pidís protección de vosotres mesmes?”
Nun hai detrás d’esti abandonu problema personal nengún, sinón diferencies de criteriu a la hora d’alministrar esti conflictu internu que min ye incompatible colos mios principios ideolóxicos y morales, de tolerancia y respetu pa con toles persones, independientmente de la so raza, relixón o identidá sexual.
Acato la decisión tomada pola Arribada, pero nun puedo sofitar, siendo fiel a los mios principios, que se permita que’l nuesu silenciu me faiga partícipe, nin siquiera por omisión, d’estes, pa min, terribles afirmaciones.
Nun quiero con esta carta perxudicar a la organización d’esti eventu nin a los demás responsables del proyectu. La rellación con toles persones de la organización de l’Arribada foi nestos años escelente y en munchos casos, más que de collaboradores, d’amigos. Pero camiento conveniente facer pública (igual que fici pública la mio entrada na organización), la mio dimisión y sobre manera, les causes que me lleven a tomar esta decición.
Gracies a les persones (amigos, collaboradores, familiares…) que nestos años m’echastéis un gabitu nes actividaes de l’Arribada. Ensin el vuesu apoyu nun fuere posible.
Inaciu Galán y González
inaciugalan@gmail.com
Inaciu Galán coordina’l llibru de monólogos «Pa echar unes rises».
